1981 Kawnpui dai Accident rapthlak kha!

- Vanlalchhunga, Serchhip

Ziahni – 28.11.1981

Long View

Nongthymmai 

Shillong

July ni 6, 1981 (thawhtan) zing khua chu alo var ta a,ka awmna PG Hostel

Long View Nongthymmai atang chuan lungsi tak leh phur takin Bus Station 

chu ka pan ve ta a. Thian thenkhatte nen chuan kan in mangtha ve ta a. Tichuan 

Mizoram Bus Station kan tih mai “Fire Brigade” ah chuan kan chuanna tur 

Bus chu alo ding ruau mai a.Ticket la nei te chuan kan Liasion Officer (Pu 

Zara (L)) chu an lo bawr laih laih mai a, mahni khaw lam pan tur tih tak ah 

kan hlim tlang hle in a lang a. Tichuan zing lam dar 6:30 chu a pel tawh mah 

a, kan Bus chuanna tur chu a chung lam an han phuar zo a, ni dang a Student 

Bus haw tur ai chuan a chung chu a vum (a sang) lo hle a, kan Liasion Officer 

hnenah pawh chuan “hei Pu Zar, nidanga Bus chho tur ai chuan thawmhnaw 

a tlem deuh niin alang a lawm mawle” ka ti nghe nghe a.

Youtube lama ngaithla duh tan HETAH

Zing lam dar 7 chu a ri dawn hnai ta a, passenger ho pawh mahni seat ah 

theuh kan han thu sang sang a, seat chang lo pawh kan tam angreng hle reng 

a, a seat inkar phei leh Driver awmna bul vel chu kan khat phei hle reng a. 

Tichuan kan Bus chuanna ZRX 82 chuan Zoram ah nu leh pa, u leh nau te 

hmu tur chuan min han tlanpui tan ta a. Thiante min thlahtu te nen chuan kan 

in Bye Bye liam ta a, tichuan Zoram lam pan chuan kan chho ta tluk tluk mai 

a. Kan hlim hle a. Tichuan KM 30 zet ahla kan kal hnu chuan kalkawng 

thingpui zawrhna hmunah darkar chanve lai emaw tur hi thingpui in in kan 

chawl a. Tichuan kan han kal leh ta a, Jowai ATS kan thlen chuan ATS a zirlai 

10 rual zet mai hian kan Bus chu an lo nghak ve a, tichuan ATS ah chuan 

minute 20 dawn lai chu kan han ding a, mahse heng zirlai te hi kan Bus ah in 

hnawh len ngaihna a awm tak ngang loh avangin kan phur tel thei ta lo a, Zirlai 

bus ah kan zirlai te an leng ve ta lo erawhchuan rilru a ti kim lo hle a.

Tihngaihna dang a awm si lo a, kan kal san leh ta chu ani mai a. Jowai pelh 

atang phei chuan kan zai tluk tluk mai a, “He lei hi chatuan ram a tling lo, 

lungngaia tahna ani maw Lalpa” tih kan han sak phei chuan tawp na chang 

kan hre lo dawn ta emaw tih a awl hle.

Sonapur ah chuan zing chaw kan ei a, hei hi zinglam dar 10 bawr vel lai a 

ni tawh a. Tichuan Sonapur chu zinglam dar 11 rik dawn hnaih ah chuan kan 

chhuahsan ta a.

Sonapur kan han pel fel chauh tih chuan kan Bus Driver in a Break an tlawh 

chuan a ri a ring tan ta hle mai a, keini ang motor chin chang hre ve lem lo ta 

chuan engmah dang chu kan ngaihtuah lem lo a, a break erawhchu a tha lutuk 

lo ani tih erawh chu a hriat mai a. Motor kan han tawk tur te chu rinai in a ding 

har daih mai zel a. Motor chin chang hre deuh ho chu an ding deuh vat nghe nghe thin a. Amaherawhchu kan Driver hi Driver zing ah pawh Senior tak leh 

khalh thiam tak a lo ni hlauh mai a, Silchar chu dam takin kan thleng phei 

thuai a. Kan Driver hi thiam hle lo sela chuan Sonapur leh Silchar inkar ah 

pawh hian buaina kan tawk hial awm e.

Silchara ‘Assam Motor Works’, MST ten an Motor siam na hmun a an lo 

hman thin ah chuan kan han lut ta a. An Mechanic ho in an han en meuh chuan 

a hnunglam Break Line hi alo chat alo ni a. Chutiang tak ani tih kan han hriat 

chuan rilru in a hlauthawng thar leh hle a.

Silchar ‘Assam Motor Works’ ah chuan darkar 2 emaw lai mai ngun taka 

an han siam hnu chuan an ‘Head-Mechanic’ chuan an khalh a, Mizoram lam 

kawngah thuife tlan in kan han test a, thatawk hle an tih hnu chuan Vairengte 

lama riak turin kan tlan chho leh tan ta a. Vairengte chu dar 8-9 inkar ah kan 

thleng chho ta a. Tichuan chaw ei in kan han darh leh ta sang sang hlawm a. 

Vairengte kan han thlen hian kan thiante hnenah chuan a chung a thawmhnaw 

la thla lo turin kan inti hlawma, hei hi a tuk zinga kan buai loh nan kan ti ani 

ber a. Tichuan Passenger ho hnen ah chuan naktuk zing dar 5 a chhuak thei 

ngei tura inbuatsaih turin kan in chah ta hlawm a. Tichuan athenin mahni 

chhung leh khat te in an pan a, a then in Hotel an pan a, mahni pan lam lam ah 

chuan kan darh ta sang sang hlawm a.

Vairengte ah hian ka thian dangte paruk nen Bus ah kan thawmhnaw te ven

pahin kan riak a. Tichuan zan dar 10 lai alo nita a, mutna tur kan han buatsaih 

ve ta a, rei lo deuh kan han ti ti hnu chuan kan han reh tan ta a, kei phei chu 

ka lo muhil hman hle tawh a, dar 11 velah chuan kan Driver chu alo lut a, kan 

han ri deuh hlut a, zan rei lam te alo ni tawh bawk a, a riahna tur a aphei chu 

tha kan ti a, engmah phei chuan min tibuai tam lem lo a. Ka rilru te te chuan 

Driver te hi zawng an hah em a, hahdamna dam dawi a ei ani ve mai alawm 

ka ti deuh a. Tichuan tuitakin kan mu ta hlawm a. Kei phei chu ka lo mu tui 

zual deuh nge ni mumang te ka nei ta nuai mai a, chu ka mumang ah chuan –

Thiante pahnih (unau) hian min thah tumin min lo um nasa hle a, nasataka ka 

tlan hnu chuan thlanmual hi ka va thleng phei ta rawih mai a. Chu thlanmual 

ah chuan a veng tu hi alo awm a. Ka han hawikual a, thlan thar tam tak mai 

laih sa hi ka va hmu ta a. A vengtu hnenah chuan heng hi tu te thlan tur nge 

tiin ka zawt a, ani chuan , ‘I thian te thlan tur anih kha’ alo ti a. Kei chuan 

anih khawiah nge ka thlan ve tur hi ka ti a, ani chuan khatah khan phei la, 

thlan lung piah ah khan a ti a, ka phei ta a, tahchuan a vengtu chu alo awm 

leh vang mai a. Khawinge ka thlan tur chu? tiin kan zawt a, ani chuan thlan 

la laih loh, amaherawhchu lai tur chin ft.6 leh ft.4 – ribbon var a ngil taka 

chhin chhiah hi min han kawhhmuh a. Enga tinge in laih ve loh? Ka han ti a, 

‘ani chuan an la lai lo anih kha’ tiin min lo chhang a” He ka mumang hi a 

tukzing a kan thingpui innaah thiante ka hrilh a, an ni chuan e – mangtha anih 

chu min tih sak a, kan nui ham ham a.

Ni 7.7.1981 zing khua alo var ta zing dar 4 velah chuan keini ho chu kan 

harh ta fur hlawm a. Dar 4:30 atang chuan thiante kaih thawh nan ‘Bus Horn’ chu kan han hmet ri ta ruai ruai a. Tichuan hmun hran hran atang chuan kan 

thian te ho chu an lo kal tak tak a. Kan han peih kim meuh chu zing lam dar 

5:15 alo ni der ta mai a. Tichuan Aizawl pan chuan kan chho leh ta tluk tluk 

mai a. Zing lam ani bawk a, Vairengte leh Kolasib inkar ah chuan kan zai tam 

lutuk lo a.

Kolasib chu zing lam dar 8 vel ah kan thleng chho ta mai a. Kan thian te 

ho chu chaw ei in an kal ta sang sang a, keini thian ho erawhchu kan ril a tam 

ve lo bawk a, thingpui te kan in ta a. Chutianga chaw te kan ei hlan chuan 

Driver chuan motor chu a lo siam mawlh mawlh a. Kan thian (Tluangtea 

Hnamte) chuan “E, ka pu, a englai nge chhia” tiin a zawt a, kan Driver chuan 

a engdang a chhe lo full-rest a lak theih loh deuh a, kan en mai mai ania tiin 

alo chhang a.

Darkar khat thuak kan chawlh hnu chuan – engmah motor lamah sawisel 

tur a awm lo bawk a, rilru dam takin kan tlan leh tan ta a. Mihring ten kan hma 

lam hun thu ah minute khat pawh kan hre lo tih hi a chiang hle in ka hria a, 

Kolasib atanga kan han chhuak te chu khawchhung ah la la chuan “Ka tho 

anga ka Pa hnenah ka kal teh ang…” tih chu kan han sa tan leh ta thuai thuai 

mai a, Aizawl alo hnai tawh bawk nen – darkar reilo te hnu ah Aizawl kan lut 

dawn tih rilru ah alo awm bawk nen, chaw ei puar nelh nawlh te kan ni bawk 

a, kan zai ring that that hlawm hle mai. Thenkhat ngaihtuah ding tak hmel te 

awm mahse a tlangpui in kan hlim tlang hle in a lang.

Kawnpui chu zing dar 10 pelh hnuah kan thleng chho a, kan chawl lem lo 

a. Mihringin kan hmalam hun turte plan lawk hle ma hila, a hlawhtlin na chu 

Pathian kut ah chauh a awm ani tih hi hriat – pawimawh hle mai keini ho 

zingah pawh kan rilru chuan thil tam tak plan kan neih theuh a rinawm a, 

Kawnpui khawlai a kan tlan lai te khan accident rapthlak kan tawk dawn tih 

kan hre lo hle a, a hnu minute 10-15 vel lawk ah kan nunna te a tawp dawn tih 

pawh kan hre lo, hliam nasa tak tuar in kan awm dawn a ni tih kan hre hek lo. 

A hretu awm chhun chu Pathian chauh ani mai si.

Kawnpui atanga kan hla sak – ‘Ka Tho anga ka pa hnenah ka kal teh ang’

tih chu ring tak leh nuam ti takin kan sa….. A hnu rei lo teah – kan chuanna 

Bus hnunglam chu kawngthlang lamah a tawlh liam ta. A ri bup a, a eng zuaia, 

a thim leh a, kan au te teng tunga, Pathian hnena in hlan a Lalpa tia ring taka 

au ri chu vawiin thleng hian ka beng ah ala ri fo….. kei chu ka harh chhuah 

meuh chuan Bus keh phel – a chhuat lamah ka lo awm reng a. Ka che thei lo,

ka bul ah hliam pui tuar rapthlak tak tak te ka hmu, ka tanpui thei bik silo….. 

ava hrehawm tak em!! Ka bul lawka Nu pakhat, ka hmelhriat tha tak chuan –

Chhunga, min han tawngtai sak teh ati a, ka rilru in ka tawngtai sak mawlh 

mawlh a, ani pawh chu a dak awrh a, a thi ta mai a. Ka bul lawk a ka thian 

pakhat pawhin chutiang bawk chuan min ngen a, kan tawngtaia ani chu a dam 

chhuak zingah a tel ve ta a. Ka chhak lawkah chuan Tui khawhthla hnuaiah li 

lian vak lo alo awma. Tahchuan hliam tuar an tla khawm nasa hle tih ka hmu bawk. An in delhkhawm ruih mai a. A then chu che chhuak thei tawh si lo 

chhantu te lo thlen hmaa lo thi ta te an awm a ni.

Min chhantu tur Kawnpui khaw mipui, zin veivak sipai hmel te an lo lang 

ta. Ruang leh chhan tlak la awm te chu kawngpui ah a remchan ang angin an 

thiar chho tan ta. Mizo nih ava nuam em!! Mahni Mizo puite ngei pawh in hai 

theih khawpin hliam pui hi alo tuar theih a lawm mawle!! Amak love…

Kawnpui Damdawiin ah min la chho ta…. Ruang hmun khat ah, hliam 

Damdawiin kawt ah kan let ta rum mai. An zingah hian ka thiante (NEHU a 

MA ka zirpui te) Zosangliana Colney, Wilfred Pahlira, Lalnuntluanga 

Hnamte, Thansangi te pawh an tel bawk a, keini ho chu Pathian zarah a dam 

chhuak zingah kan tel hlauh hlawm a.

Khatih laia Kawnpui Doctor – Dr. Zoramthanga fakawm zia, Damdawi in 

a thawk leh Kawnpui khaw mipui fakawm zia tak kha ava ropuiin, ava Kristian 

tak em…….

Kei atan ngat phei chuan Dr. Zoramthanga nupui leh Kimtei (H/S Teacher) 

min tuamna tur puan nena min rawn zawng chhuak a, ka lo thih si loh avanga 

duat taka min enkawltu te kha an va hlu em!!

Ka chhungte ka thi emaw ti a ka ruang la tura lo kal, ka kuang tur –

Darthlalang vuah ngat, Pu Chhingkawnga (Chanmari) te siam, ka pu 

Hrangthanga Colney Jeep a rawn phurh thlak, hman ngai leh ta si lo, 

Champhai lama kan chhungte hman chhoh tak te kha ka hre reng dawn anih 

hi…

Kawnpui leh Aizawl inkar khaw tinah ruang leh hliam phurte min lo hmuak 

a, Civil Hospital a mipui tam zia zozai te kha aw…. Thla khat leh ni nga Civil 

Hospital a ka awm hnuin damdawiin ka chhuahsan ve thei ta a, kum tawp 

lamah ka zirna chhunzawm leh turin Shillong ka pan veleh thei ta.

Thihna hlim kawr ruama han awm meuh chuan hengte hi ka ngaihtuah –

- Pathian thatzia leh thil tih theih zia te, Mizo nih nawmzia, tanpui ngaite tan 

atawp thlenga kan inpek peih zia leh harsatna ruamah chuan a zo a vai thliar 

hauh lova in tanpui thin hnam kan nih hi.

(Vawiin July ni 7 alo her chhuah leh hian ka Accident tawhpui boral ta te 

leh nung dama la awm zawng zawng te tan he thu hi ka hlan e.)