Naupang bo leh an hmuh leh dan mak!!

by:- Fela pa

@@@  Mizoramin Gospel Centenary kan lawm mup mup hma kum chiah a thil thleng kha a ni a,thu mu tawh hnu nimahse amak hle mai a,kan kaitho leh ange! Kum 100 chhung Kristianna in min chiah tawh dawn a ni chung pawh a Ramhuai chetna langsar leh mak deuh deuh hriattur ala awmfo mai hi amak a ni.

He thu hi he thil tawngtu te remtihna a rawn tarlang tur ka ni a,an hming hi chu adik tak ka hmang a nga,khaw hming leh thil hming dang erawh kan thup thung dawn a ni;a chhan pawh thu kal toh leh a chhungte tan pawh a hriat nuamlo te a ni thei a,tullovah mi kan tibuai mai mai palh ang tih a hlauhawm!! 🫢 

Kum 1993 kha a ni a,hetih hunlai hian khaw mitam zawk eizawnna chu thingtlang loneih kha ala ni mai a,chumi tuk pawh chuan thlawhma lama hna thawk turin an liam leh sung sung tawh a,thenkhatte phei chu riak nghal turte anni nawk hlawm a.Lalrinhluate pafa pawh chu riah tum zingah chuan an telve a.

Lalrinhlua hi naupang kum 12 mi lek nimahse naupang fel tak a ni a,Skul chawlh lai hi chuan apa hi theih tawpin a phungbawm ve thin a,hemi kumah phei hi chuan a nuin nausen a pawm bawk avangin anu ai a awh pah a ni ber mai!!

Hemi tumah pawh hian a pa hnathawh hlan a,eirawngte lo bawl a,tuite lo chawi sak ṭhin turin a kalve a ni.Tichuan,an thlawhhma chu an thleng a,tul ang ang antih zawh chuan a pa chuan hna a thawh san a,Rinhlua chuan tuite chawiin Thlâmah chuan a theih ang ang chu a ti ve bawk a.

Zanriah an eikham chuan a pa Siamzika chuan eng eng emaw khawihin a buai hle a,Rinhlua erawh chu a mu nghal thung a,reife hnuah chuan Rinhlua pa chuan inthiar atum thu a fapa chu a hrilh a;Mahse,chhqnna erawh a dawnglo thung a,afapa chu a muhil tawh a nih chu a ring ve mai a,inthiar tur chuan thlam kawmchar lama Inthiarna an siam chu a pan san ta a.

Khua chu veng viauin Arsi te chu pe tuarh mahse a khat tawk chuan thli a thaw leh deuh vuk vuk thin a,chutia Rinhlua pa a inthiar mek lai chuan thlam chhung atangin hlauh hmel taka,"Ka pa" ti a,a fapa au ṭhat ri chu a hre ta phut mai a.Tichuan,muangchang zuilo in Thlam lam chu a pan ta vat a,a fapa reng reng a hmu ta lo,angaihna hrelo takin a hawihai hle a,thlam kaitenah te chuan chuang chhuakin a fapa chu a aû ta chiam chiam mai a,mahse,a reh hian a reh tlawk tlawk mai si a,a au ri thangkhawk ruih ruih bak chhanna a dawnglo,a fapa chu a thawhât ngai a hre silo a,An váu lamte chu a torchlight chuan chhun kual  pup pupin a ko vak vak reng bawk a.A reh zui tak hmiah si avang chuan a beidawng ta hle mai a.Chutih lai chuan thlâm chhak atang chuan éng a rawn lang ta a,mihring thawm niawm tak pawh hriattur a awm zui bawk a.

Chutah meuh chuan Rinhlua pa Pu Siamzika pawh a thaw ta huai a,nakinah chuan êng chu alo hnai zel a;Mahse,a fapa nilovin an Rï amite pa pahnih hi anlo ni zawk a,Pu Siamzika thawm hria khan an ngaihthalo chuan anlo pan hi alo ni a,Tichuan,anni pahnih nen chuan vau chheh rawp chhung velte chu an zawng ta chiam mai a,mahse,zan thilthute anih avangin sulhnu thar han hmuh mai tur anneilo a,an zinga pakhat Pu Zuata chuan,"Hetiang chuan a tha dawnlo tawp mai,hei khua ala hma bawk a,kan bul vela riakve dangte hi i pun belh mai ang u,a tulleh In lamah pawh zualko kan intir mai dawn nia" ati ta a.

Tichuan,chumi zan chuan an rî a riakve mi sawm dawn lai mai nen chuan an theih ang tawk a nasa in an chheh vel chu an zawng a,a hnuhma leh a thawm hriattur engmah anhriaiin an hmu zolo a,amak antiin an beidawng hlawm hle a,A bo dan ringawtah chuan Khawmu chawibo anih chu an ring ber a.

Tichuan,Rinhlua te thlamah chuan khua an nghak tlaivar a,atuk zingah chuan khawlamah zualko an intirta nghal a ni.

Khawlam atang chuan mi tlawmngai thahnem tak anlo thleng bawk a,a bo dan chinchangte an inhrilh hnuah chuan han bultan mai dan tur pawh an hrethiam mailo hlawm a,Thlâm atanga insem darh a a zau thei ang ber chu zawn tawp mai an tum ta a ni.

Chumi nileng pawh chuan Lalrinhlua chu a thiin emaw pawh an hmuzo ta chuanglo a,a tukah an zawn hmabak atangin an zawng leh ta a,chutah pawh anla hmu zo chuanglo,an beidawnna belhchhahtu mai mai zawk a ni.Tichuan,Rinhlua bo thu chuan an chhehvel  khual khuate kaiin khaw  engemawzat, khawtlangin an zawng ta mup mup mai a,a dap pawh an dap zau  hle mai a;Mahse,a sulhnu tak ngial pawh hmuh belh annei chuanglo!! Chutiang reng reng chuan Mizo dan angin ni sarih chhung an zawng a,an hmuh tak siloh ah chuan a vuina hun an hmang ta ngawt mai a ni.

Khawtlang chuan Rinhlua zawn hna chu chawlh san in vuiliam tawh mahsela,Rinhlua pa Pu Siamzika chuan a fapa chu ala dam a ring tlat a,ala beidawng ve mai duhlova,ala zawng ru reng tho a ni. 

Rinhlua zawnna hun an chawlhsan atanga chawlhkar hnihna velah chuan Pu Siamzika pawh chuan a fapa chu a zawng leh ta a,chumi tum chuan an Lo râl lehlam mual Pangkâi ngaw antih lamah chuan a chhuak a,a hma pawh khan he mual dung hi chu an fang nasa viau tawh tho nghe nghe a.Mahse,Pu Siamzika hi chuan  a fapa la botu hi chuan khawimaw laiah a hnutchhiah leh mai a ring a ni.

Chumi ni chuan,khua ten a zir lutukloh avangin ram chhuak dang an tamlo hle a,a kalna mual lamah ngat phei chuan kalve dang pawh an awmlo a ni.Hmuh mai inring tak in Pu Siamzika chu a fapa zawng chuan Ngaw hnuaiah chuan a vak kual rak rak reng a.

Kawrte ruam pakhatah chuan lutin,lui hnar lam zawngin a zawh chhova,chutihlai tak chuan a hma lawk hlam sawmnga bawr velah chuan Sazuk chal em em mai,ki zâr bûng tawh hi a rawn lang ve hlawl mai a; Mahse, Pu Siamzika thinlungah chuan chu Sazuk chal kah chu alian ber tlatlo !! kah chakna em em pawh a nei hranlo, Chu Sazuk chuan ngampa takin tui chu a dâwt a,a duh tawk a in hnu ah chuan veilam kopangah chuan a per kai leh ta a.Pu Siamzika chuan a thlir reng ringawt mai a ni,dik tak chuan a silai ken pawh Sapui leh sakawlhte laka inven nan a ken ve chauh zawk a ni. Tichuan, Sazuk chu a thlir liam ta ringawt a.

A tuk khua alo var chuan Pu Siamzika chu a fapa zawng turin a thawk chhuak leh ta a,a hma ni lama a kallohna lam mual chu a pan ve leh ta thung a,reife chu chu ngaw hnuaiah chuan amahin a tei leh ta rak rak a,chawhnu thlang her bawih ah chuan thawm ri deuh sat sat hi a hria a,a han ngaithla chiang a,a lam pana rawn ri niin a hria a,chutih lai chuan a hmalam hnim pik chu a che ta sat sat a,Pu SiamZika chuan a silai chu muangchanglo in a han ban nghal vat a,kah mai theih tur chuan a tin ta ran a.Mahse,a rinloh deuhin a hmaa Sazuk alo hmuh tawh bawk kha a hmu leh ta thut mai a,chu Sazuk lah chuan a hlau ngai miahlo leh nghal si a,mak ati rilru ta hle mai a,Sazuk chuan a rawn thlir vung vung a,ani pawhin kah a tum biklo;Chutah sazuk chu a thle buk a,veilamah chuan inherin mei thên lauh lauhin a kal sawn leh ta a ni. Pu Siamzika chuan chutia chu Sazuk nen an inhmu leh mai chu mak ati deuh tawh a,engemaw hriattir tumte a nei a nih chu a ring ta rum rum a. Tichuan,hmanhmawh takin Sazuk kalna lamah chuan a tlan liam ve ta nghal a,karloah Sazuk pawh chu a hmu leh ta a,tichuan, a zui ve ta zel a,rei ngial an inzui hnuah pawh engthil danglam mah ala hriat belhloh avang chuan Pu Siamzika pawh a beidawng tan tawh a, inngaihtuah tha lehin "Kei hi ka rilru kal ding lutuk ka ring mai mai a ni ang,he ramsa pakhat ve mai hian engmah min hrilhlo tawp ang" tiin a kirsan leh ta zawk a.

He mi zanah hian Pu Siamzika chuan Mumang mak tak mai a nei a,chu a mumangah chuan chhun lama akalna ah bawk khan a fapa zawngin alo kal leh a,tahchuan a Sazuk hmuh bawk kha a hmu leh a;mahse,mak deuh maiin Sazuk chungah chuan a fapa chu alo chuang tlat thung a,amah rawn enin a kut chuan a rawn hui zauh zauh a,mahse,zui tumna reng reng anei lova, tichuan,boruakah an thamral ta leh ta a ni." a than harh chuan mak ti takin chhunlama a thil tawnte chu a ngaihtuah kir nauh nauh a,midang bula a sawi lahin tumahin barhah an khawn pui der silo.Sazuk Chal zet mai a hmuh fo kha engemaw tak chu a nih a ring rilru ta deuh a,hmuh leh ngei chu a châkta et et mai a ni. Tichuan,Chutiang vel ngaihtuah chuan karlo ah a muhil zuive leh ta a.

A hma lawka a mumang zawm niawm tak mumang dang a nei leh ta a,a fapa chu lungngai em em in a mutna bulah chuan alo ding reng mai a,a mu lai chu rawn chhuk bih reng chung chuan,"Ka pa ka awmna ka hrilh dawn che a,ngati nge minlo zui duh loh" ati a,athamral leh ta riai riai mai a. Pu Siamzika chu chiang zet chuan a harh chhuak ta hlawl mai a, a mumang chuan awmzia a neih a ring nghet tlat tawh a ni,khua vâr thuai thuai sela,Sazuk zawng a chhuah leh mawlh chu a chak zek zek tawh mai a. Tichuan,mutmu pawh tuah tha hleithei tawhlovin a tlaivâr zui ta a,Sazuk chal zawng tur chuan vartian atanga insiam tanin hmâ vêk vâwkah khua chu a chhuahsan leh ta a ni.

Theih tawpin chu Sazuk chal chu zawng mahsela, vanduaithlak takin vawikhatmah a hmu leh ta miahlo a ni.Tichuan, Hun leh ni te ral zelin beidawng takin a fapa zawnna pawh chu a bansan ve ta hret hret a.

Nikhua alo rei a,Rinhlua bo atanga pawhin thla a vei leh ta a,Rinhlua te chhaklam khua a awm pasaltha pathumte chuan thilmak tak mai antawng a. An khaw thenawm a mibo nen pawh khan inkungkaihna nei ngei niin an hria a ni.

Nikhat chu chung pasaltha pathumte chu sapêl turin an thlang lam ngaw dur khup mai lam panin an chhuak a,sa hnu tharte zawngin ngaw ril lamah an lut thûk zel a,chutihlai chuan Sazuk chal em em chu an hmaah alo chhuakta bêr bêr mai an hmuh chuan an phu deuhza2k hial a a ni, kah tum chuan silaiin an tin thap a,mahse tu silai mah chu a puak thei ta hauhlo mai a,mak antiin  kah thianglo anihte chu an ring a,silai lah chu a thatlohna an hre dêr bawk silo..Sazuk chu inher vutin an sirah chuan a kal phei ta thauh thauh a,an ui ngang a ni ang,an umzui ta talh a.

Tichuan,thui vaklo an zui leh hnuah chuan,kham ko deuh hlek lai an thleng ta a,chumi sirah chuan an Sazuk umlai chu liam thlain anni pawh chuan an zui thla ve zel a,kawr dung chu pawhthla in thuivaklo an chho leh a,Sazuk chu ko ah chuan a per kai ta a, an chung zawn a mual rawn pawng chhuak deuhah chuan a pil bo ta a ni.

Tichuan,Sazuk lawnna koah chuan an chho ve zel a,Mual ko an han chuang chhuak ve a,tahchuan pûk tê tak tê alo awm a,an lawn chhohna bak chu kal khàn dang  a nei miahlo bawk .Mahse,mak tak maiin Pûkah chuan Sazuk awm reng reng an hmulo a,chumai bakah chulai vel chu alo rimchhe hle mai a,an han belchian deuh chuan pûk kilah chuan mitthi ruang chhe tawh tak lo let reng chu anva hmu ta a,a thawmhnaw hak vel dan atang chuan,tu hrilh hran ngailovin an khaw thenawm a Pu Siamzika fapa Lalrinhlua ngei kha a ni tih an hrethei ta a ni.

Tichuan,muangchang lovin Zualko an intir zui ta nghal a,Naupang khawngaihthlak tak Lalrinhlua ruang chu hlawmin vui dan pangngaiin an vui tha leh ta a ni.

....Atawp ta.....

(Phalna la hmasa lo in Youtube ah chhiar phal a nilo...@mawialenex..)

.

.