Kha Rest House Kha

  - Lalzamliana Pachuau

He kan thu chhiar tur a hmun/khua leh mihring hming te hi mi pawi sawi palh theih anih avangin tarlan a rem dawn lova in mi hriatthiam na ka han ngen hmasa e.

Kum 2007 August thla khan, chhim lam district capital pakhat ah sawn Department pakhat a an Multifunctional High Speed Printer a chhiat avangin siam tur leh Servicing ti nghal turin min rawn ko a.

Tichuan Aizawl aṭang chuan ka hnathawh na hmun tur lam pan chuan Maxi Cab (Sumo) in zing 6:30Am ah ka chhuak ta a. Ka kalna tur khua hi a hlat ve tham deuh hlek avangin Lunglei a riah phei phawt a a tuk leh lam a hahdam deuh hlek a thlen phei ka rilruk a, ka tum ang chuan ka kal ta a. Lunglei aṭang chuan ka hnathawhna hmun tur Department Office chu chawhnu her ah ka thleng phei ta a, ka tih tur te ti nghal zung² in ka tih zawh hnu chuan ka hna thawhna Office a an Pu ber chuan an Staff pakhat in a zanriah ei a an Department Rest House an Office bul lawk a awm ah chuan riak mai tur in min ti a. Thlenna tur ngaihtuah chawp leh ai chuan tiin ka remti ve mai bawk a.

Zanriah te kan ei zawh hnu a rei mawi tawk a kuang te ka âwm hnu chuan ka riahna hmun tur Rest House lam pan chuan min thlah phei leh ta a. Hetih hunlai hian ruahtui a la hul lo viau mai a, hemi ṭum pawh hian tlai lam dar 4:00 vel bawr aṭang in tam lutuk lovin ruah sur cherh² kar ah kawl kil lam ah kawl phe zawr² in khawpui a ri kal ruah² reng mai bawk a. Chutia ka riahna tur Rest House lam kan pan chu Chowkidar in ah chabi te lam in chowkidar chuan min rawn zui ve nghal bawk a. Rest House kan han thleng chu ka rin leh beisei a pha lo kher mai, Assam Type hlui rawih ve tawh tak mai hi a lo ni a, a chhung kan han lut chu luah lum ngai loh tih hriat tak mai hian hmuar rim leh sazu rim nge ni a thang deuh nghuat mai a. Living Room angreng deuh te chu a hnawk nuaih mai bawk a, Chowkidar chuan ka room tur te min kawhhmuh in, ka mutna tur te chu min siam sak nghal zung² a. Mutbu vel chu a rimtui loh em avang chuan mutbu dang min ngaihtuah sak mai turin ka ngen a, ani pawh chuan an in lam a an mutbu neih ang² te chu min han laksak ve leh mai bawk a.

Ka mutna tur te kan singsak  fel a ka ṭhian ten min ṭin san hnu lawk ah chuan Power Supply (Current) a awmlo zui nghal hmak mai, ruah lah chu a sur tam tulh² mai a thli lah chu na angreng takin a rawn thawk tel bawk a, ka riahna in chu a nghing leh lawih² ṭhin. Eng (bati, lalṭin) lah chu han chhit tur engmah lah chu a awm bawk silo nen, mu tur chuan ka inpuahchah ta a. Ka muhil lai chu engvang tehreng nge mawni chiang em² mai hian ka harh hlawl mai a, sana kan en chuan dar 10:25pm chauh a lo la ri a, muhil leh mai thei ta lo chuan ka harh tulh² mai a, ruah leh thli lah chu a la thawk nasa khawp mai a, current lah chu a lo la awmlo cheu mai lehnghal.

Ka rilru ngaihtuah na kawm a ka mut men kar lai chuan thli chhem chet ni hauh lo chuan in chu a rawn insawi ta lawih² mai a, lirnghing emaw ka ti hman a, chutia ka ngaihchan reng lai chuan a hma ai a na mah hian vawithum a rawn insawi leh ta lawih² mai a, chumi rual deuhthaw chaun inchung rangva chu a inphawk ta emaw tih mai tur hian a ri hrâwk² mai a. Ka Room kawngkhar inhawng kau deuh aṭang chuan Living Room Ceiling Fan a mihring inkhai niawm tak mai hi kawl rawn phe eng zawr kar ah chuan ka va hmu a, ka va han phu nasa tak em, vawt tih vang ni hauh lo in ka khur ru der² mai a, ka blanket chuan ka inlukhup a ka thlan te chu a tla nghal zawih² mai. Ralkhat ah lah chuan ka boruak tawn mek nen a inhmeh zet mai chuan khawpui chu a ri kal ruih² mai bawk a. Hetiang tisa piah lam thil hi hlau lo ka inti ve viau ṭhin kha a nia, mahse mahni chung a an tlak meuh chuan a dan a lo dang khawp mai..

Khawpui ri leh kawlphe zawr² kar ah chuan vawi leh khat ah inhnuai lam aṭang chuan zawhte an rawn hram/rak phut mai chu ka va han phu nasa kher em, thla chu nei ila inchung su pawp hawk khawp in ka thlawk chhuak ta ve ang. Thawk leh khat ah ngaih ti ṭhalo rum² hial khawp in khati tak a ruah tam leh thli thawk nasa si kha a han duak mai a, chuti tak mai a thawm an reh chiang mai chu awm a ti nuamlo letling zawk. Chutia thawm leh tildang hriat tur an awm tak loh ah chuan ka pangngai leh ta deuh mai a, muthilh tum chuan kan intintuah leh ta a, mahse engemaw tak hian min mawlh a ka harh tulh² mai a ka muhil thei ta reng² lo mai. Chtia ka muthilh theih tak loh ah chuan zunram te thiar turin thimtham ah chuan indap chawp takmeuh chuan toilet lam chu kan pan a, zunram te ka thiar zawh a ka khum lam pan a ka phei chu engemaw hian min rawn su thawi fua mai a, a rim lah chu a thang deuh nghur mai lehnghal. Hlauhna bawk chuan min rawn tuam leh ta mup² mai, ka khum ka thlengphei ka khum kan dap chu ka blanket sin lai leh lukham chu a lo awm ta hauh lo mai, ka ke chuan chhuatlai vel chu kan dap kual vel a, ka khum mawng lam ah chuan a lo awm daih mai. Ka mu fel leh deuh chiah tih ah chuan ring em² mai in ṭek a rawn tla leh ṭhuai mai, ka va han phu leh nasa tak em. Living Room lam ah chuan eng thawm emawni ka hre leh ta tlat mai, chu thawm chu thawm dim deuh a kal ri ṭhep² hi ang ka ti ber, thawm ngaichang a ka beng ka tun deuh hra lai chuan thlang lam pang a tukverh chu intheh hawng ṭhuai in tukverh darthlalang keh chuai khawp chuan a inkhar leh ṭhuai mai. Han intih pa viau pawh tum ila a tih theih tak² loh ani ber mai, khum kil bang ngheng chuan ka blanket a inkhuh chung chuan ka ṭhu tawm chawih² mai. Khua chu a var har ka tiin khawvar hun mawlh mai chu ka va han nghakhlel tak em. Ruah chu a mal a lian ani tih hriat tak mai hian a rawn tla leh ta phuar² mai, thli lah chuan bang te chu a rawn chhem keh mai hlauhawm khawp in a rawn chhem ri leh ta sawk² mai, thing zar te chu a auh ri tuarh² mai bawk. Inhnuai lam ah lah chuan patling na tuar rum ri niawm tak mai hi a rum ngul² mai lehnghal, ka hlau lutuk chu ka rilru in ka ṭawngṭai mawlh² mai a, in lah chu a rawn insawi leh ta lawih² mai a. Tlanchhuah a in lo hnai ber a tlan luh mai chu ka duh rum² mai, mahse tlawm pa ek ah ka la ve khanglang bawk si. Ka hun tawn tawh ah chuan hun kal muan ber leh hreawm ka tih ber ṭum a la ni hial awm e. 

Kawl rawn phe eng zawr² kar ah chuan bang a sana intar chu ka va en a zing dar 4:00am a lo ri ṭep tawh a, chtia sana ka en ka han hawi let leh chiah chu kawl rawn phe eng zuai kar ah chuan bath room kangka bul ah chuan thil hmuh ka nei ta tlat mai, mitkhap kar lek mah nise ka hmuchiang hman hle, mipakhat hi a lo ding zûn mai a, a hmel te lah chu a rapawm in a chhe em² mai a, a beng te chu a uai hnu mai a, hnar a lawi pawh a neilo, a mit aṭang te chuan thisen duk em² mai hi a luang chhuak nguah² mai a, ha mumal pawh a neilo tih hriat tak mai hian a ṭhen thi sung mai a, min deusawh niawm tak mai hian min rawn nuih nimai hian ka hria a. 

Ka khaw hmuh te chu a fiahlo in ka mit te chu a vai in ka vaih ruai mai a, ka thil hriat te chu a hla tual² nimai hian ka hria a, ka chianglo tual² a, engmah ka hrelo chuan ka awm zui ta a.

Ka mit chu kan meng diar² a, fiahlo ruai hian ka mutna bul a thil inkhai chu a var vek a inthuam hian a lo khawih mawlh² a, ka phu leh dawrh mai, chutia kan che lawih leh ka mit meng ṭan diar² chu ka bul a mi chuan min lo hmu in, "E... kha, i lo harh tawh ani maw" tiin min rawn bia a, chutia min han biak tak ah chuan ka pangngai leh ta vat a. Kei chuan ka bul ami hnen ah chuan 'Khawiah nge ka awm?' tiin ka zawt a, a ni chuan, "Hospital ah, thlamuang deuh khan awm rawh, engmah hlauh tur a awm tawh lo a nia" min rawn ti a. Ka bul a mi chu Nurse a lo ni a, min kalsan leh nghal ta mai a. Kan hawi kual vel chuan ka khum bul vel ah chuan damlo leh anmahni awmpui tu te chu an lo awm ve far bawk a, ka thla pawh a muang ve suai² mai. Rei vaklo hnu ah chuan ka hnathawhna Office staff pahnih hi an rawn lut ve nghal a, ka khum bul ah chuan rawn ṭhu in, "Kha i lo harh tawh ani maw" tiin eitur min rawn ken te chu min pe a. Kei chuan, 'Engatinge hetah ka awm' tiin ka zawt he haw a.

An ni chuan, "Tukin zing dar 6:30am kha Aizawl pan a i chhuah hun tur a nia, kan Pu in kan Office files ṭhenkhat Directorate lam a thehluh tur hi, 'Min ken sak sela a ṭha ang' a tih avangin thawn tur che in Sumo Counter lam ah hmu tur che in kan rawn kal a, Sumo kal hun tleng a i hmel hmuh tur a awm mai loh avangin a ngaihna kan hrelo hle mai a, Sumo pawh in darkar chanve dawn an nghak che a, rawn lan tih i neih takloh avang khan an kalsan ta ngawt mai che a. I rawn lan tak loh ah chuan Rest House Chowkidar kha kan rawn phone nghal a, lo ngaihven tur che in kan chah a. Ani chu i riah na Rest House lam ah khan rawn kal nghal in, khum bul a hmel duk vek a nikhaw hrelo a i lo let reng kha a rawn hmu ta che a, ani chuan min rawn phone leh in ti hian Hospital lam ah kan phur phei ta che anih hi, tiin min hrilh a. Chumi te bawk chuan, "Nizan lam ah i chung ah enge thleng reng² a, i lo tawng ve ani maw?" tiin min zawt a, ka lu chu ka bu ringawt a.

Chutia eng² emaw kan sawi hnu chuan, "Kan Staff pakhat in a rawn awmpui ang che" tiin min chhuahsan zui ta a. Reivaklo hnu ah chuan Staff pakhat min awmpui tu tur pawh chu a rawn thleng zui ve ta mai bawk a, ka harh ṭha tawh viau bawk nen kan ti ti zui bawr² a, kawm lah chu a lo nuam phian mai bawk a. Chutia kan inkawm bawrh² tak ah chuan ka riahna Rest House chanchin te chu min hrilh chho ta a.

"Saw Rest House ah sawn kum 2001 khan Department Financial/Account Audit nei a rawn kal te chu an thleng a, zan lam a an lu kai deuh tawh han inkawm ho chu an inhnial buai ta a, an boruak pawh a sang chho ta khawp mai a, an zing a pakhat chuan chu an inhnial na chu pai dai ve mai theilo in an zing a pakhat hnamdang awm ve Bihar lam mi chu a muthilh lai chuan inchhung a Brick bung lo awm chuan a bek veilam dup vek khawp in a chhu hlum ta mai a. He tualthat tupa pawh hi a zan la² hian Police kut ah inpe nghal in, thu neitu lam chuan IPC Section 302 charge in Capital Punishment an pe zui nghal bawk a. He Rest House a thil duhawmlo tak mai tualthahna hial a thlen tak ah chuan, he pa thlarau hian he Rest House hi a chenchilh ta reng niin a lang, kha thil thlen hnu aṭang khan tumah hi an thleng ngai tawh lova, thleng pawh han awm ve bawk ṭhin mahse zan han hmang tluan pawh hi an awm ngai meuh lo, zankhat an riak anih pawh in an riak nawn leh tawh ngailo. Mahse kumhnih vel liam ta aṭang kha chuan engmah sawi zui tur hi hriat ani ta ngai lo. Tualthat tupa pawh hi he a thah pa thlarau hian umzui zel in rapthlak tak² in a nghaisa ṭhin a, a tawp ah phei chuan a tan na Jail ah amah leh amah a intihlum ta ngawt mai ani" tiin.

Keipawh hetiang a ka chung a thil duhawmlo tak mai an thlen hnu ah khan, engmah min hrilh lova kha Rest House a min thlen tir mai kha an inthiam lo viau mai a, an Pu ho² in ngaihdam te pawh min dil nasa viau mai a, ka inenkawlna senso leh transportations zawng² min tum sak ta vek ani. A hnu a he khua a ka kal leh pawh hian he Rest House ah hi chuan ka thleng leh tawh ngailo chiang khawp mai.