Mizoram State Bird Vavû

VAVU (Hume's Pheasant)

Mizoram State Bird

State Bird

Mizoramah hian sava chi hrang hrang a tam hle a, Mizoram General Knowledge bu ka ziah tantirh lai khan Mizote hian sava hming eng zat nge kan neih hriat tumin ka bei chiam a. Sava thuhmun, hming hran kan vuahte pawh a awm maithei a, chhim leh hmar, chhak leh thlangten a hming kan vuah pawh a inang lo thei a. Chuti chung chung chuan sava hming hrim hrim ka la khawm a, tihsual pawh a awm maithei. Mizoramah hian sava hming nei 237 a awm a ni. Chung sava zinga State Bird hming kan vuah tak VAVU hi a vannei ngawt mai.

Kan naupan lai chuan, 'Bawngpa leh Chinrang an mawi ber a, Vacha a thlawk thui ber a... Mu chiten sa an ei a, Kawlhawk thau a tha,' kan ti thin. Bawngpa nia kan sawi thin sen vat mai hi a nu zawk zu ni teh tlat a.

Vavu hi eng vanga State Bird ni nge?

Mizorama sava tam tak zingah Vavu hi eng vanga State Bird ni nge hriat a har hle a, kan hotute hian sava vang tak leh mang maithei a nih vanga State Bird hming chawitir ta mai an nih hmel. Mizo thawnthu leh pipute nunah pawimawhna a nei hranpa lo va, hla thuah te pawh hmuh tur a awm lo. Amah hi sava mawi tak erawh a ni.

Hming put chhan

Mizoten VAVU kan ti a, Va chu Sava sawina a ni a, Vu kan tih chhan tak hi a nguma a hmul rawng danglam tak vang niin, hei vang hian VAVU nih a hlawh ta a ni. Sapin 'Humes Pheasant' an ti a, a chhan nia an sawi chu British Naturalist lar tak pakhat, Allan Octavian Hume (AO Hume) nupui Marry Ann Grindall Hume hming chawiin Hume's Pheasant emaw 'Hume's Bar Tailed Pheasant' tiin an vuah ta a ni.

Nihphung

Vavu hi Vahrit chi khat a ni a, leia tla chi, thlawk tam lutuk lo a ni. A taksa a len avang leh a rih avangin Vahrit te ang bawkin a thlawk tam lo. A hmui a kawm van a, a biang a tai sen tek bawk a. A nghawng hmul a dum tle hlar a, thenkhat laiah a pawl rawng te pawh a awm bawk a. Thla khawng tha tak a nei a, a mei a sei mawi hle bawk. A pa dul bawr leh pang sir tawn chu rawng sen uk a ni a, a awr, nghawng leh awm bawr te hi a tlangpui thuin rawng uk dum dal deuh a pawl thin. A hnungzang leh thlate chu rawng sen uk leh eng sen, rawng sen dukin a tial tlangpui bawk. A ngum leh mei bawr velte chu rawng paw tak leh varin a tial a, a mei hi rawng dum leh rawng sen ukin a tial bawk a. A nu hi vutbuak rawng leh eng buang deuh, rawng uk, dum leh sen ukin a tial tlangpui a ni.

A len zawng

A pa puitling taksa sei zawng hi 90cm vel a ni a, a nu hi 60cm vel a ni thung. A pa hi 975 - 1080 g vela rit a ni tlangpui a, a nu hi 650 - 850 g vela rit a ni tlangpui.

Awmna ram

Vavu hi India hmarchhak ram leh Myanmar khawthlang lamah a tam deuh a, tunhma chuan Mizoramah hmun hrang hrangah hmuh tur a awm thin. Phawngpui National Park leh Murlen National Park-ah te a tam zual deuh a, sahuanah te pawh hmuh tur a awm bawk. Tlangram, lung khawkrawk tamna hmun, thing hnah tla kawlh lo chi tamna hmunah a awm tlangpui a. Thing bawrchhawr leh hlobet tamna hmun, tuipui zawl atanga teha 740 - 2400 m a sangah te a awm thin. Kham chhawrdawh, lung tohlawt vela khawsak hi nuam an ti hle bawk.

Chi thlah dan

Vavu pa hian a nu pahnih pathum vel a hokhawm thin a, February - July velah chi an thlah a, March thla velah an tui tlangpui. A tui chu a nuin a awp a, vawi khatah paruk atanga sawm vel a tui tlangpui. A tui hi a var eng (yellow) lam deuh a ni a, ni 24 - 28 chhung vel a awp thin. Kum khat an tlinin Vavute hian chi an thlah ve leh thei a ni.

A ei duh zawng

Thlairah, thingrah, thing hnah nem, thlai zik no leh thlai zungte an ei ber a. Changpat, thing nget, hnapkhawn leh rannung te chi an ei thin.

Danin a humhalh

International Union for Conservation of Nature (IUCN) Red List 2007 chuan chi mang hlauhawm thei zingah a dah a, Wild Life Protection Act 1972-in schedule khatnaah a dah bawk. Dan lova Vavu tihhlum chu mana hrem theih an ni.

Source : Forest Extention Division

(Kan rama savate hi zawi zawiin an tlem deuh deuh va, chuvangin, a neituten i humhalh tlat ang u.)