Hlamzuih Thlahrang

HlamzuihThlahrang

-Mawia LeneX_

He thil thleng mak tak mai thlen hun hi ala reilo hle a,Hripui leng avanga zoram puma inkharkhip kan puan tirh ah  khan a ni a,A ni leh thla erawh chiang takin sawi fak lo ila a tha zàwk awm e. 

Kan In hnuai hi chhungkaw pakhat hian anluah a,àn felin keini nen pawh kan intichhungkhat hle a,ei leh in engkimah pawh in ban tawn ren reng kanni thin a ni.Kan inhnuai nu chuan naute thar duhawm deuh mài a nei a,kan lawm tlang hle mai a.Naute lah chu a hmel tha in a chum hle a,a duhawm reuh hle a ni.

Naute leh a nu pawh an tha chho ve zel a,a pian atanga a nithum ni chawhnu lamah chuan beisei loh tak thil a thleng ta tlat mai,in hnuai nu chuan min rawn ko tuarh tuarh a,an pa a awmlo tih kan hria;ràng takin kan tlan thla nghal a,naute chu a lo kaih nasa mai hi a ni a,a hmel chu a dang lep a,a in pawtsawi kual nasa mai a,khawngaih thlak hle mahsela a rapawm lek lek a ni.Theih ang tawk leh thiam ang tawk tawk chuan kan han bawihsawm ve takna in kan in chhan zo ta lo a ni.

Nàute piang tirte nimahse keini a chhungte tan chuan puitling boral sun takin kan sun tho a,a nu phei chu atap nasa hle a ni.Tichuan mitlem tein vuina hunte hmang vein kan kawmthlang huanah chuan kan phum ta à ni.

A hmel thain a duhàwm reuh tehlul nen kan ui tlang hle mai a,chutia a rawn kaih thut mai pawh chu mak kanti hle a ni.

Kan vui tukah chuan thingpui in pahin tukverh kà han dak a,kan naute thlàn chu engemaw hian a hai chiam a ni tih hai rual a nilo.Mak ka ti lem hranlo;a chhan pawh kan vengchhungah hian neitu nei tho si vài Ui chuang vah ta mai mai hi an tam hle mai a,kan Vc te chuan khuahkhirh ve bawk mahsela awmzia a nei tamlo hle a ni.

Tichuàn,midang pawh hrilh hran lovin thlan chu ka vur tha ve leh mai a,lung tlem a zawng chuan ka chhilh nel nual bawk a.Ui haina pawh ang ka tilo a,mahse ui lo chuan an hai ngawt ka ring bàwk silo,ngaihthatlohna nei hran lemlo chuan ka chhoh san ve leh ta a.

Zanah chuan kan boruak tawnin a zir vang nge ka muhil thei hleklo mai à,ka let ka let a,a khat tawkin ka zung sek mai bawk a,chutiang reng reng chuan chu zan hun chu ka hmang a Sana dar chu ka chhiar chho nghauh nghauh mai a ni.

Zinglam dar 2:00 velah chuan thawklehkhatah thli a rawn thaw leh huau thin a,khua atha hle si a mak ka ti rilru viau mài a,chutah kan kawmthlang atang chuan naute tap ngek ngek ka hre ta phut mai a,ka ngaihthlak chian pawh chuan ka hresuallo chiang hle a ni.

Kan naute thlan engin emaw alo suasam vak mai bawk si a,kan naute hian thla a nei ve a ni ang a,te ka ti a;Mahse,ka inthiam leh chiah lova tuin nge naute thar nei àng aw tiin ka ngaihtuah leh ta zawk a,reife mai chu a tap ngak ngak reng a,a hnuah chuàn a reh ve leh ta mai a.

Nasa tak a thli thaw vuk vuk ang mai hian pawn boruak chu a ri leh hum hum reng a,ka sitting room darthlalang chu ni maiin ka hria,kut kik ang mai hian a ri kurh kurh reng mai a,zan rehàh chuan a ninawm duh hle a,kan kalh nghet lo anga thliin a chhem hawng a nih chu ka ring a,zun ram thiar pah a va en chu tumin ka tho chhuak ta a.

Light kan off vek avangin a thim hle a,switch chu ka hmet ri kauh a,light en rual chuan engemaw thildum hi tukverh lamah chuan zuang chhuak ni mai hian ka hmu a,tukverh ri kurh kurh ka sawi kha a ni a.Mahse parda zar chu chet pawh a chet eih siloh avangin mak chu ka ti deuh a,mahse thil ni thei ve tho ah ka ngaih avangin tukverh chu a in hawngin Zawhte a zuang chhuak a nih chu ka ring mai a,hlauh lamah erawh ka en lemlo;kalh that tum chuan ka pan thla a.

Mahse,tukverh chu alo inkalh tha thlap si a,a mak ka ti ru hle a,ka mitvai mai mai a nih ka ringleh ta zawk a,thli thaw vuk vuk thin avang chuan khua chu han chian mai mai ka tum a,darthlalang chhan atang chuan vàn boruak chu ka thlir kual vel a,khua chu a thiangin Arsi pawh a pe tuarh mai a,thli thaw eih pawh a awmlo a ni.

Chutia ka hawikual vel pah chuan kan naute thlam lam chu ka zu thlek hram a,tukverh eng chuan fiahlo takin a chhun thei a,thlan pawng chungah chuan thil dum ren ren Uichal tiat vel tur hi a thu muk mai a,kan thlek ngial a,a lu emaw awm ang reng reng ka hmu theilo a,enge a nih ka chiang thei miahlo! Tu uipui riltam emaw vak rawllai mai mai a nih ka ring  a,Thlan haitu pawh kha anih ka ring mai a,tunah chuan a hai theih ka ring tawhlo a,ngaihthatlohna pawh ka nei lo.

Ka tlaivar chu a ni deuh ta der a,ka mut leh law law chuan ka mutui leh lutuk si ang tih hlauin chhungte thawhhma chuan ka thova,thingpuite ka chhuangkai a,khua a var chiangta bawk a zan lama ka thil hmuh leh hriat chu chian ka tum rilru a ni.Tukverh chu hawngin naute thlan chu ka han thlir a,a hma mi ang chiahin naute thlan chu engin emaw alo suasam leh chiam mai a;Chutah zet chuan mak ka ti ve tawh a ni,naute tap ka hriatte ka mitvai a ka ngaihte chu atak atak a nithei mai ang a tiin a theih anga fiah thuai chu ka rilruk a ni.

Ka chhungte ho ka zawh lahin kan inbul hnai velah naute nei thar an awm an hre bawk silo,Ui chungchang erawh Ui chuang vak atam em avangin ka zawt duh lem lova,ka thil hriat leh hmuhte pawh ka hrilh duh lem lova;kan nu erawh ka hrilh thung a,ka beisei aiin alo ngai thutak fe a ni ang,a hnu a ka hriat leh danin....!!

Tichuàn,thlàn chu ansiam tha leh ta a,Lunglian tak takin an chhilh phui vek a,thingtuaiin an hung hnan ta tlat bawk a;Tunah chuan eng Ui leh Chinghnia pawhin a hai thei hauh tawhlo ang le!! A sawi pawh kan sawi zui hran lem lo!!

Kan naute boral atanga a zanthumna chiah a ni a,zan dang ang bawkin khua athiangin vanah arsi a pe leh tuar tawh a,thla de tir chu khawchhak lam her hretah a de seki leh van tawh bawk a ni,mi tam zawk chu an mu tawh a,kei erawh zan hmasa ang thoin ka la mu mengkar reng mai a,zan chu a reh tial tial a,sana chek chu a ring tial tial bawk a.

Dar 2:30am a ni dawn tawh ang,thli thaw chu a rawn awm leh tan ta a,a ri leh huau thin a,a reh hmak a,thawklehkhat ah a rawn ti leh hum hum thin à,enge lo thleng dawn ti a ngai chang ràn chung chuan ka mu  chu kà harh reng a.Nakinah chuan naute a lo tap leh ta ngek ngek mai a,chuvelleh kannu chuan min rawn khruh zeuh zeuh a.

"Ilo harh ve reng à ni maw,tu naute nge maw ni dawn le?" ka han ti thuai a,"Tu naute mah a nilo ang,kan naute thla kha a ni ngei ngei ang,kei chu ka rap deuh tlat tawh a nia” a han ti a.

"Nutling a pumpa in naute tap mai mai hlauh thu a awm love,mu mai mai rawh,a reh ve leh mai ang"tiin ka hnem ve bawk a,diktak chuan a sawitu ber pawh chuan ka hlau ru deuh tlat a ni.

Chutiang a reife a tah hnu chuan a reh ta hmak a,naute tap mai bakah thawm dang pawh a reh hmak mai bawk a.Muthilh tum chuan kan han chhing ren rawn a,rin ang ngeiin ka zun a rawn chhuak leh ta a,bathroom pan tum chuan ka tho chhuak nghal a.Chuveleh kannu chuan rang mangkheng hian minlo zui thuài a.

Sitting room chu a thim  hle a,chumai bakah a boruak chu uap deuh churh hian a hriat a,thaw a ipik mup mup niin ka hre ber a.Light zawng zawng chu kan nu chuan a on eng ta uar mai a,engmah phei chu hmuh tur leh hriattur phei chu a awm zui lo a,bàthroom ah pawh chuan ka rual zel chuan kan nu chuan min zui lut a.A hlau hle tih ka hrethiam mai a,amak pawh ka ti lemlo!!

"Chutia nangmeuh lo tihlau thei chu enge maw ni ang,kan enfiah ange" ka ti a,Tukverh lam chu ka pan nghal a,kannu pawh chu amaha awm hrang ngamlo chuan minlo zui ve nghal zat bawk a.

Dik tak a sawi chuan parda han hlim chu ka hreh rilru ve khawp mai a,mahse rilru a inti paukhauh lui ve tlatin,"Khawnge patling zahmawh thankin zet tawh kannia lawm mawle!!" tiin parda chu a han thehhlim thak a.

Van a arsi te chauhlo chu hmuh chian an har hle a,thildang hmuh leh hriat tur teh chiam a awm lo,ngawi reng a kan hawi kan hawi hnu chuan mit pawh a fiah ve tial tial à.

Kan beisei ruk deuh tlat kan rin siloh chu naute thlan chungah chuan alo thu leh ran tawh mai a,a che hrut hrut tih chu a hriat theih a,mahse han thlek ngial pawhin a lu leh hmel awm alang thei tlatlo mai a.Chutah chuan kannu chuan a hlau tak zet tawh a min rawn kuah deuh chul tawh a,"Engmah hlauh tur a nilo,Ui mai mai a nih khu.."tiin darthlalang chhan atang chuan kan la thlir dun reng a.Dik tak chuan mit laksawn pawh kan ngamlo a ni ber tawh a.Mak deuh maiin chu thil chuan min rawn thlir ve reng ni a hriat tlatna ka nei tlat mai a,ka hmulthi te chu a ding ve er er mai!!

Chutah le!!! Chu thil dum Ui chal ruàl vel tur chu kan lamah a rawn per ta nelh mai a,Darthlalang ah chuan a rawn bei thlawp a,zep thu a chenglo ve...Kan te dun thawt nghe nghe a ni.Chutàh in hma tawn chuan kan in en ta khai mai a. 

Kannu chu a khur dar dar a,min kuahna pawh chu a hmer na ngat ngat hle mai... Nimin piah mai a kan vui liam tak kan naute chiah chiah mai chuan darthlalang a bet chung chuan min rawn thlek haw mai a,minung hmel a pu tawh lova var eng puap a,a damlai a a duhawmna te chu hmuhtur a awm tawhlo,a mitmeng erawh a fiah kilh kelh hle a,chu chuan chiang fahran hian min melh dun zak zak a.Chutah,a nui ta ver ver a,hlauhawm pawh a ni hranlo mahse a nui chu a danglam tial tial a arapawm tak zet tawh a ni,a ka chu a khabe thleng thleng chuan a ang a,Ha zum tak tak a nei tuarh mai bawk a,chutih pah chuan a kut te tak te mai chu darthlalang keh ah chuan  a rawn zet lut tham tham a,keini kanlo tawlh hnung ve hret hret a,a ban chu a rawn fan chho zel a,min man dawn tep tihah chuan kannu chu a te ta vak vak mai a.Chuveleh kan naute thla pawh chu rang zetin a insa seng nghal ta a ni.

Kan thenawmte leh Inhnuai ten kan thawm engkim an hre vek tawh bawk a,zep kan tum ta bik lem lo,atuk zingàh chuàn Naute thlan chu a hma aia suasam nasa zawkin kan hmu leh a,a tihngaihna tak pawh kan hrelo!! Lung lian tak tak kan dahte leh a hungna banril kan phunte chu hnehsawh tak tak a,phawi leh paihdarh nuaih mai a ni a,Engpawhnise,Pastor hriattir phawt chu thain kan hre ta a ni.

👉 Youtube: Hlamzuih Thlahrâng

.

.5/3/2020