Detective ropui Sir Sydney Smith

Ziaktu -  James Steward Gordon

Sir Sydney Smith-a hi New Zealand ram, Roxburgh khuaah kum 1883 kha’n a lo piang a, Edinburgh ah medical science a zir a, a graduate hnu chuan Doctor hna thawk ve lauh lauh a, amaherawhchu loneitu nupui raipuar thichhawngin a na a, a enkawl tur chuan an rawn ko a, mahse a nunna chu a chhan hman ta lo a, a rilru a nat em vang chuan  Doctor hna bansanin hnuchhui lamah a inhmang ta zawk a ni.

Department of Forensic Medicine ah Asst hna an pe a, a hlawh a tlem viau na in a tuichilh hneh em avang chuan a damchhung zawngin  a thawk ta ngar ngar mai a ni.

Cairo khawpuia a awm laiin a hnathawh lai chuan Parcel pakhata ruhro pathum awmna hi an rawn thawn a, ngun tak mai chuan a han en vel a, heti hian a result chu a puang chhuak ta a. 

“He ruhro hi hmeichhia kum 23 leh 25 inkar, nau vawikhat chhiat tawh, kebai lehnghal a ni a, tualchher silai hmanga kahhlum a ni a, kah a nih atanga ni 7/8 vel chu  a la dam” a tit a mai a, Police pakhat chuan awih lo tak mai chuan, “Chu a mit rawng pawh I sawi thei hial anga?” tiin a lo elsen a, Sir Sidney chuan, “A buang a nih ka ring, “ a la ti ta deuh deuh a.

Police ho chuan an han bawhzui a, Egypt mi hmeichhia nau vawikhat nei tawh, kebai bawk chu thla thum kalta vel kha’n chin hriat lohin a bo tih an hre ta tlat mai a, an chhui an chhui a, a tawpah a pa chu an man ta a, a pa chuan a silai a tihfai na lamah a fanu chu a kap palh tih a sawi ta mai reng a.

Engtinnge a hriat mai theih tih an han zawh chuan, Sir Sidney chuan, “Thil harsa a ni lo, ruhro kha khêl ruh pahnih an ni a, a kumkuruh atang khan nau a nei tawh tih ka hre thei a, a khêl ruh te kha an inlen hleih avangin a ke a bai tih a lang a, a khêl ruh ah kha’n Silai kahna hnuhma a lang a, tidam leh tura thuina hnuhma a lan bawk avangin ni engemawzat chu a la dam tih a lang reng a, a mit  a pawl tih thuhla kha chu Egyptian ho hi chu an mit a pawl râm thin avangin ka han rin sawi ve mai bawk a ni e,” a ti a.

Vawikhat chu nu pakhat hi a hnathawhna ah a lo kal a, “Ka pi chu ram lumah i awm nasa a, tin, lehkha chhu a eizawng i ni in a lang,”a lo ti a

A thiante chuan, “Engtinnge chu chu i sawi mai theih?” an lo ti a, ani chuan, “A har lo, a hmel kha nisa em nasat tih a hriat a, a taksa dang kha a ngo hle si a, a vun pangngaiah chuan a ngo hle a, tin,  a kutzungtang hmawr te kha an arh tlat a, khawl chhu a ni tih ka hre mai,” a lo ti a.

Vawikhat pawhEgyptian  Nu hausa tak pakhat hian a lunghlu tlang Super Diamond hi a tibo a, a chhui turin Sir Sidney chu an rawn pun a, a han chhui chian chuan chu nu thenawmpa chu a mawhpuh tlat mai a, ani lah tan taktein a lo tang ve bawk a, thubuai remtute chu an buai map mai..

Sir Sidney Smith chuan, “He nu tukverh atang hian tuemaw chu a lut ru tih a hmuh theih a, inchhungah Bilat lei a kai a, tichuan pheikhawk hniak a hmuh theih bawk a, Chemte leh a pâi hnutchhiah a ni bawk a, tukverh ah lazâi perekin a taina a awm bawk a, chu chu kawr atanga mi a ni in a lang bawk a.

A bo zanah hian hepa hi Sakawrtawlailir khalhtuin a hmuh thu min hrilh a, a hmuhna hmun pawh a duhawm lo hle lehnghal, kan thiannu in leh a vel hi Bilat lei a ni a, a thenawmpa kawtzawl pawh a ni tho mai, ka han en vel a, he pa pheikhawk hniak hi a verandah ah pawh ka hmu a, a kwtzawl nen chenin, kan thiani inchhunga pheikhawk hniak leh hepa in verandah ami hniak chu a induh chiah a.

A inah amah a awm loh hlanin ka va leng a, a chhiahhlawhpa ka va kawm a, Chemte ka chhar thu ka va hrilh a, ani chuan a pu ta ngei a ni tih min lo hrilh a, a kawr thenkhat en ka duh thu ka hrilh zeuh a, a pu kawr min entir zinga pakhat chu perek taina a ni tih ka hre nghal mai a ni. Tin, Lazâi nen hian a  induh leh chiah bawk,” a ti ta a.

Chutia a han ti chu chu pa chuan kâ ho hian a lo ngaithla a, a inpuang ta nge nge a.

Vawikhat leh pawh Putar pakhat hi thah a ni a, Police ho chuan an rawn pun leh a, a ni chuan a han chhui leh a.

A fapa kahhlum a nih thu a sawi leh ta mai, a fapa lah chu tan tak te in a tang a, Police ho lah chuan an ring lo hlawm hle a,”Mahni pa kaphlum duh tur khawpin hepa hi a sual lo ang, kan hriatchian alawm,” an lo ti ve bawk a.

Sir Sidney chuan, “Ruang kha ngun takin ka en vel a, silaimu ka phawrhchhuak a, tualchher silai a ni, a thih zanah hian he putar hi a chhuak lo a, a fapa hi a chhuakvak lo bawk tih an pitar in a sawi a.

Silai kahna hmuamhma atang hian hnai tak atanga kah a ni tih a hriat, a fapa hian pawn atanga rawn kap a ni tih a sawi a, chuti nise engtinnnge silaimu luhna hmuamhma ah hian  engatinge zen phuhna a un thawt theih? Tualchher silai an kawl thu an chhaihhlawhpa in min hrilh a, tin hepa hian leiba a ngah a, a pa hian rosum thahnem tawk tak a hnutchhiah dawn bawk a, hemi zan hian a pa nen hian an inhauh nasat thu an sawi vek bawk.

An in leh a chhehvelah ka va teihawi a, a thih zanah hian ruah a sur a, mahse hniakhnu pakhat mah pawnlamah hmuh tur a awm lo.

An inah hian chhiahhlawh mipa pakhat leh an nu ber nen an cheng ho a, he an fapa hian an silai hi a kawl a, an huan dil sava kah nan a hmang rim hle niin an sawi bawk a, a silai mu leh Putar ruang atanga silaimu ka phawrh chhuah hi a induh hle bawk.

A landan atang chuan hepa kah ngei hi a ni,” a ti a.

Chu tlangval chuan a kah a nih thu a sawi ve tawp mai a ni.