Khehpuam (by Vanneihtluanga)

Khehpuam nghawng hi a na hle mai. Ruihhlo rapthlak takin min run let phawt a.

Hmun lailia mi dikte chu heng mi dik lo,
hausa thar thutte hian sum hmangin an rawn nek chhuak lawp lawp ta mai bawk si.

Khehpuama hausate endawng ngam lo

khawpin kohhran leh khawtlang hi kan lo rawp tawh bawk si.Reiloteah kan biak in bula hmun tha leh laili tamtak hi khehpuama sumdawngten

min luahlan zel ang a, kan football club tha zawng zawng an sponsor ang a, kohhran leh
khawtlangah thawhlawm tam tak an thawh ang a, in hmun mai ni lovin kan pawmpuina hi sumin an rawn lei dawn.

Inthlan leh hmasa berah kan politician te leh a party chawpin an rawn lei leh ang. 

Latin America rama drug cartel inkhuar
ngheh dan angin kan ram leh hnam hi kan kal mek. Sawi ngam loh hun kan neih hmain sawi vat a ngai!


A buaithlak lai ber chu tu ber hi nge khehpuam vanga hausa tih finfiah hi a ni. Rinhlelh chu kan nei. Finfiah hi a har.

Chuvangin, sawi chhuak miah si lo hian, chhungkaw tinin kan rinhlelhte chungah hian action lak mai tur a ni.

Eng tin nge kan tih ang?

Danah kan hneh lo. Sumah kan hneh
lo. Khawtlang rilru kan thlak erawh chuan kan hneh thei.

Engnge kan tih theih le?
Khehpuama hausate hi mi anchhedawng an ni. Eng tikah emaw, he kan damlai chhung ngei hian Pathian in a hrem dawn. 

Tek a tlakin an bulah ding suh. 

A deng ve palh ang che!

Khehpuam chhungkua ami reng reng ngaizawng suh.

Hausa mahse an fate pawh nupui pasalah nei suh. 

Pathian hremna tuar ngei ngei tura rinhlelh number one ber kherte nena thisena insuihzawm hi Pathian malsawmna daltu a ni, chhungkaw chi mang palh theihna a ni.
In veng hmun lun laiah ram an lei a, in ropui tak an rawn sa a nih pawhin tlangneltir suh. Khawhar inah an lo luhin,khehpuama i rinhlelh bulah thu suh.

Hetia i tih hian tu pawi mah i sawi lo va, eng dan mah i
bawhchhe lo va, i hlauh a tul lo va, i zalennna i hmang a ni
mai. Kan ram tichhe duh khawpa mi pamhamte lehzel ZAH hi
he hnam hian kan ba lo.

- Vanneihtluanga


. . . 🌸(Tlaizawng Pâr)