Big Bang Theory

   Tun tuma kan thu khel tur hi chu a theuneu lo viau mai a, Scientist-te'na an ngaihruat leh thlir dan kha a ni.



Thenkhatin kan hriat tawh viau laiin, thenkhat tan chuan tuipui phak loh thil a ni ve leh tlat thung.

Engpawh chu nise, Scientist-te hrilhfiahna chipchiar hrut lovin, a tawi zawngin sawirem ta mai ila. sawi thui vak lovin i tan nghal mawp mawp mai teh ang....

Universe chu Hun (time) leh Hmun (space) leh a chhunga awm zawng zawng chu a ni. Universe chuan, planets, stars, galaxies, galaxy leh galaxy inkara thil awm zawng zawng, subatomic particles te ber te leh, matter leh energy te a huam a ni.

Ti hian sawi ta ila, Universe-ina a huam chin chu, Khawvel leh a pawna thil awm zawng zawng hi a ni. Mithiamte'na universe an hmuh theih chin zau zawng Diameter chu 28 billion parsecs (91 billion light-years) a ni a.

Mahse, Universe pum pui zau zawng erawh hriat theih a ni lo. Tawp chin a nei nge nei lo tihah pawh hian ngaihdan a tam hle a ni. Light-year chu eng kal chak lam tehna a ni a. eng (light) hian kum khata a thlen theih chin hi '1 lightyear' a ni.

Heti khawpa eng kal chak tan pawha kum Tluklehdingawn 91 chhung kal ngai chu a hla vang vang hle a ni. Eng (light) hi Second khatah 300,000 km a chakin a kal thei. Chuti khawpa chak eng pawhin 46 lightyear a kal ngai chu, Alien-ho pawhin Hla te khua an ti ve ngei ang.

Recorded history zawng zawng, cosmologies leh cosmogonies leh scientific model hrang hrang atangtein, Universe hrilhfiahna a tam hle a.

Quantitative geocentric models hmasaho puchhuaktu chu ancient Greek philosophers leh Indian philosopher-te an ni. Chu model-ah chuan, Solar system lai takah hian kan khawvel (Earth) hi a awm tih a ni.

Kum zatel a liam hnuin, astronomical observations dik zawk a lo chhuak leh a. Nicolaus Copernicus-a heliocentric model of the Solar System leh, Johannes Kepler-a'n elliptical orbits model a duan te a lo chhuak a.

He model-ah hi chuan, Solar system lai takah Ni a awm tih a ni ta a ni. Chu chu a hnuah, Isaac Newton khan, theory of gravity hmangin a hrilhfiah leh ta a ni.

Observational improvements a awm leh zel a, Solar System pawh chu, Arsi tam lutuk galaxy (Milky Way)-a awm a ni tih an hrechhuak leh a. Chumi hnu pawh chuan, kan awmna galaxy hi, galaxy tam tak zinga galaxy pakhat ve mai chauh a ni tih an hrechhuak leh ta zel a ni.

20th century tir lama galaxy-ho hi redshifted a ni tih hriatchhuah a nih khan, Universe hi a fan zau zel a ni tih a tichiang a. cosmic microwave background radiation hmuhchhuah a ni khan, Universe hian bultanna a nei tih a tichiang bawk a ni.

Kum 1990 tawp lama an enchianna atanga lang ta chu, Universe fan zau chak zawng chu a rang sawt hle a. Chumiin a kawhtum chu, Universe-a energy tam ber chu tunah eng nge a nih tih kan hriatchian loh a ni a, chu chu Dark energy niin a lang. Chu lam chu duhtawk phawt ang.

Big Bang theory chu cosmological model lar ber a ni a, Universe lo pianchhuah dan ngaihruatna a ni. Eng Thil emaw ni, a mak a mak a muk hi a awm a, chu chu thawk leh khatah, na lutukin a puak ta thut a, chuta a siper tang chuan engkim hi a lo insiam ta a ni.

Big Bang atang chuan Hun (time) leh hmun (space) hi a insiam a. Chu chu energy leh matter tam zawng tawk chauh nen a inpawlh a; Space a fan zau takah chuan, matter leh energy density chu a lo tlem ta tial tial a ni.

A fan tirh khan, Universe chu a dai raih a, chuvangchuan, subatomic particles an lo insiam theih phah a, a hnuah simple atoms an lo insiam leh a.

Chung Giant cloud elements-te chu, hmun hrang hrangah gravity vangin an inbelhkhawm thluah hlawm a, zawi zawiin Arsi a insiam ta teuh mai a ni.

Hemi model hi a dik hmel ber a, a dik a nih chuan, Universe hi kum 13.8 billion vel a ni ang.

American astronomer Edwin Hubble khan, hla taka galaxy awmho chu a han en a, chung galaxies te leh redshifts an tihho khan inlaichinna tak an nei a.

Chumiin a kawh chu, hla taka galaxies leh Arsi bawrkhawm clusters te chu an tawlh hla tial tial a ni. A hla apiangin min tawlh hlatsan chak tihna a ni.

Direction mumal bik awm lovin an tawlh hla hret hret reng niin an sawi. subatomic particles hmasa ber berte chu protons, neutrons, leh electrons a ni a.

Big Bang awm atanga minute tlem teah, simple atomic nuclei insiam mah se, electrically neutral atoms hmasa ber berho insiam hmain kum sangtel a vei leh phawt a ni.

Big Bang atanga insiam atoms tam ber chu hydrogen, helium leh lithium a ni a. A hnuah, chungho Giant clouds chu inhipna (gravity) vangin an inbelhbawm ta vak a, Arsi tam tak insiamin, galaxy a tama tam mangkheng a lo awm ta a ni.

Big Bang theory hrilhfiahna hi, mithiamte'na Van boruaka an thil hmuh hrang hrang atanga an ngaihruatna mak danglam tak a ni a.

Chungte chu, light elements tam lutuk, cosmic microwave background, large scale structure leh Hubble's Law vangtea an ngaihruat theih chauh a ni.

Universe hi energy mak takin a tuam khup mai a, chu energy chu Dark Energy tih a ni a, chu chuan Space pum pui a awh khat vek a ni. observations atanga rin danin, Universe pum puia energy density 73% chu Dark Energy a ni.

universe la naupan deuh lai (Universe insiam atanga kum a la vei tam hma) khan, Dark Energy nen a inchhungfin a, mahse, Hmun a la tlemin thil engkim mai chu an la inbichilh hlawm hle a.

Chuvangin, gravity a chak em em mai bawk si a, thil engkim mai chu a inphih darh ta vak a, universe chu a lo fan zau tan ta a ni.

Kum tluklehdingawn-tel a vei hnu a, Dark Energy a lo pun tak tial tialah chuan, Universe fan chak zawng pawh a lo nasa ta hle a ni.

Mahse, Dark Energy chu eng thilin nge siam a, eng nge a composition tih lam chu scientist-te paw'n an hre thei tlat lo a ni. Big Bang hrilhfiah dan tha tak mai chu, Big Bang hi, Universe hmun awl lai luah khat tur a, pawn lam hawi zawnga matter puak darh a ni lo va.

Hmun (Space) leh Hun (Time) chu hmun tinah a fan zau vak a, hmun leh hmun inkar a lo hla ta dawrh zawk a ni.

Opeey-a Khiangte

Tlaizawng Pâr