ZOHUAIA ZARAH

- Lal PhoeniX
.

Thangkhat lian zet zawt chu a ni ve ta ang,khatih lai kha chuan thian hova thil han tih khawm vel hi nuam kan ti thei em em a,school chawlh chang chuan a hman pawh kan hman na rawh e! Chhungte thawhchhuah sa ringin kan hlimin kan inti thei ve em em thin a ni.

.
Nikhat chu kan skul chawlh lai hian luiah Chengkawl meichher chhit kan rel thlu ve a;Mahse,tu a mah chuan kan lo la chhit ngai ikhaw der lo mai a,kan plan chu a flop deuh nghal dêr mai a.Kan vanneih a siamin kan Û rual daih,ramvachal ve tak si,ngawi chawi leh tawng tlem zet mai U Zobiaka chu kan sawm thlu thei ve ta hram a,ani hemi atang chiah hian a nia hming thar mawi tak mai thawnthu lo irh chhuah dan chu...,a hming tak tak emaw ti te pawh anla tam viau...!!?
.
Chawhnu thlang her bawi ah chuan lui lam pan chuan Vawk kawng tum ni awm takah chuan kan inzui kawi thla ve dam dam a,kan thian ho hi panga lai kanni a,U Zova chuan hma a hruai a,Ulhbun silai a pu ngoh ngoh a,ngawi rengin a tûr nei kal ngut ngut a,keini thian ho lah kan ri teng tung thung a.Mahni puanthuah kan ak bâwk far mai bawk a,kan hlim viau tih tur chi a ni.
.
Rei ngial kan kal hnu pawh chuan kan tum ram chu kan la thleng thei mai silova,U Zova hnenah chuan, "U Zo... kan thleng dawn tawh em?" kan intih chhawk deuh reng mai a,U Zova lah chuan tha deuh hian,"Dawn tawh e" ati reng mai bawk a.Mahse,kan thleng thei chuang miahlo!!
.
Kan thian ho pawh kan chau ta deuh a ni ang,kan ngawi nghiai hlawm tawh a,beng lah a kiu muah muah tawh mai bawk nen,ngawi reng chuan U Zova chu kan zui hnak hnak a,kan riahna hmun tur chu tlai Ni tlak dawn suar suar ah kan thleng ve thei ta hram a,U Zova tih loh chu Bûkte chhuatah chuan kan sapúl tluk ngût hlawm a,a upa ber chu a buai ta zar zar a,zah leh tlawmngaih pawh a sawi hleih theih loh kan chau ve a ni mai a,tun hnu a ka ngaihtuah hian U Zova lo fel zia kha aw...hmeltha chu ti miahlo mahila ava lo zaidam tak emmm...
.
Zanriàh eikham chuan khua chu chiangkuang takin kan nghak thim leh te te a,a chhan pawh U Zova'n 'Zân a rei tulh tulh a,Chengkawl te chu an tam tual tual thin a nia' ati a, thianpa Hlîr-Lumûma chu alo phur thak hle a,"Zanlai pelh thak thlengin chhit ang u aw,min hawsan vek mah ula keimah pawn ka khawrh char char tho ang..." tiin thiante zingah chuan a phài hnah hriàm ve hmel fù mai a,midang pawh chuan kan hnial em em lo niin alang ve tho mai.
.
Thla ên hunlai nimahse chhum atam em avang chuan a êng chau rau hle a.Meichher chu kan chhi kai ta thliai thliai a,,U Zova chuàn chengkawl chhit dan formula hrang hrang chu min hrilh mawlh mawlh reng a,,a sawi dan chuan lui vàng zawng chuan a khàt mawi tawkin kan intlar thap tur a ni a,meichher a inhliau palh te a hlauh awm a,tichuan hma lam panin a rualin kan zawng chho zel anga,tumah kal chak fal bik awihloh a ni" U Zova chu a tirah kan rin loh teh lul nen thil a lo hre fu niin kan ngai hlawm a,kan ngaih pawh a ngam deuh hlek a..
.
Tichuan,U Zova sawi ang zel chu alo ni a,amah U Zova leh kan thian zing a upa ber U Râwna chu a sir tawn tawn ah an tang dún a,kan tan chho tan ta,U Zova'n,"in bengchheng chuan in chengkawl man tur te kha an tlanchhe vek mai ang,ngawi rengin inman mial mial mai dawn nia,mihring thawm an hrethei teh a nia" atih chu hre rengin kan reh thiap a,a sawi ang chiah chiah chuan formula chu kan apply zel a ni. Lui ral ngaw kar a Mutê hram kûk kûk leh Vabak thir chher ri chhur chhur in chhawn tawn reng te chu keini tleirawl patuai deuh tan chuan a râpawm lam mah a la ni thei a,a khat tawka lung rap pelh a,tui kan dai ri leh bawrh thinte,tui a meichher kan hnim hlum leh zauh thinte,bul a mite meichher a kan hliau palh leh zuau zuau thinte chu nuihzat thlak thin teh mahse U Zova'n nuih mai mai a phal tlat lova,amah pawh a nui ngai hek lo!
.
Minute tam kan la khawrh hma chuan U Zova chuan,"Ding lawk tu,kan hma lawk khi ni tawhin ka hria,Sairîl Lî awmna kha....a thûk hle a ,fimkhur viau ang che u,chesual an awm nual tawh a nia,buaina kan tawh chuan thiante auh vat tur a ni" atih chuan min ti phawklek riau mai a,tichuan,muangchang chuan kan khawrh chho leh ta bek bek a,a hma a kun ngar ngar thin si kha kan ding chhuak ta sek mai a,hma lam chu kan thlir leh vung vung bawk thin a.
.
Thawk leh khatah a sir leh lam awm U Râwna chu te chiam chiam pahin alai lamah chuan a rawn tlan phei ta buan buan mai a,chuveleh,U Zova lam pan chuan kan tlan phei ta suau a,athen an tlu ri bawrh bawrh a,meichher an chiah hlum a thim hnuai ah chuan bakbalèngin U Zova lam chu kan pan khawm vek a!!
.
U Zova chuan,"Enge ni a?" alo ti thuai a,U Râwna chuan sawlai tiaupho ah sawn mipakhat athu reng a nia,minlo en reng mai a,thlahrâng a ni ang,a chê pawh ka hmu chiang lutuk" a hanti a,a hlauh hmel hle mai a,midang pawh chuan kan hlau hle tih a chiang reng bawk;Mahse,U Zova chuan a hlauh ve hmel miah lo !! U Zova chuan engtin nge atih dawn amah chu kan thlir thap a,chutah,"Engmah ani lovang,hlauh tur a awmlo,tikhan lo awm ru ka va enfiah ange" ati ta mai rêng a.
.
A Silai chu bûkah adah daih avang chuan a chempui chu a phawrh a,a hnungah chuan muangchang chuan kan zui ve bawk a,a chhan pawh kan thianho chauh a awm kan ngam tawh lo a ni ber.U Râwna sawina lai velah te chuan ava kal kual vel a,hnimbuk leh lung phen velte chu a enkual thuak thuak a;Mahse,tumah ava hmu miah lo.Kan thaw deuh huai a kan ngaih erawh a ngam chiah tawhlo,U Zova chu huaisen kan ti ta em em mai a,chuta tang chuan alawm Zohuaia alo nih tak reng ni,'U Zohuai' kan tih pawhin amah pa zaidam ngang chuan a haw ngai miahlo,mi pawhin an ko ve ta zel a,tichuan a hming chu Zobiaka nilovin Zohuaia alo ni hlen ta a ni.A la huai zel dawn chauh....!!!?
.
Tichuan,nuam ti tawh vaklo chung chuan kan khawrh chho lui leh ta a,U Zova lî sawi chu kan hnaih ta viau a ni ang,a khat tawk chuan kan hma lawkah chuan a ri leh burh burh thin a,kan in en leh hru hru a,U Zova kan va en ve leh thin a,ani lah engmah hrelo ang maiin Chengkawl chu alo chhar mial mial mai si a.Mahse,li chu alo hai hauh lova a hêlna lamah chuan min hruai kawi leh ta diah diah a,a ruk tak chuan U Zova hnung a kal chu kan inchuh ru deuh tlat tawh hlawm a,ri hlekah chuan kan tang hrú zel tawh mai a.
.
Lî kan hêl zo chiah a,luiah kan lut leh chiah tihah chuan kan hma lawk meichher chhun phak chiah si lo ah chuan tui dai ri buan buan kan hre leh ta thut mai a,chutiang zan reh ah chuan a chiang bawk a,kan vai chuan kan hre rual a ni chèk ang vaukam lamah chuan kan tlankir nghal diâk mai a,kan lîm chak hlawm bawk a niang kan li hêl tanna hmun kha kan thlengthla der mai, Karei leh !! U Zova alo tel ve miahlo,thlahrang khan a man ta a ni ngei ang!! hawsan ringawt chi a ni silo,han enfiah leh ngei tum chuan fimkhur tawpkhawkin kan veh chho tham tham a,meichher pawh pakhat chauh kan ti êng ngam a,a upa ber lahin hma hruai ngam tawh heklo,a hma a zànlai thleng thleng pawh khawrh ngam inti Hlîrlumûma lah chuan haw a ngen sek tawh mai si..kan hma tâwn tur chu lungbang ni zawk sela kan ti..!!
.
U Zohuaia lan theihna tur chin phairuang buk kar atang chuan kan han bih dèk dèk a,a meichher chu tiaupho ah chuan alo alh vut vut a,amah chu lung chungah thuin meizial alo fawp èng pút pút a,kan thaw leh ta huai mai,U Zova chu huai kan ti leh ta em em mai a,Zohuaia ava ni tak em vele aw.A hming thar hi a va pu zo tehlul em!!! Amak a ni,kan ti ru vawng vawng hlawm a!!*
.
Enge anih kan zawh chuan,U Zova lah chuan,"Thlahrang emaw Pheichham emaw vel mai mai a niang!" ati ringawt bawk si a,angaih hoh hmel si a,U Zova chu kan han en thin Huai hi kan ti em em ringawt mai a ni.Thlahrâng nge pheichham chu ni tak tak ang le?!! tih chu kan zawhna,chhan mai theih siloh chu a ni ta a ni.
.
Thildang hmuh leh buaina hranpa tawk lem lovin kan riahbûk chu kan thleng ve leh mai bawk a,kan Pathian hi chu ava lo tha thin tak em!!Mahse,buaina dang kan nei zui leh ta tlat mai !!! U Zova chu amah chauh a Sa kah tur zawng a chhuah a tum mauh mai si a,kal ve lah chu a phal der silo,kan va mangang tak em, a tello in kan awm ngam dawn tawh ami?Kan thiam ang tawk a kan thlèm chiam pawh chuan kan au ding zo silo..!!
.
U Zova chuan Sazuk pachal,Sakhi, Sanghal emaw Ramar leh Vahrit pawh niraw sek sek,"Rawn kap hlauh sela aw" tih lam kan ngaih tuahlo,alo haw hun lo nghah chhuah lam pawh alang lem lo bawk! U Zova chhuah hnu reilote ah chuan mutna kan siam a,kan mu ta diak a,mut chhuak erawh kan awm lo,chumi zàn a kan thil hmuh leh hriatte chu kan report sep sep ngam chauh va,chutih lai chuan thing ni awm tak tlu ri deuh ruah ruah thawm kan hre leh ta phut mai a,kan ngawi nghal thap a,kan beng chu kan chhi ru hru hlawm bawk a,chu zan zet chu kan châk ang ngawt chuan kan hmang nuamlo kher mai.Chutah,kan bati chhit chu thliin ala rawn chhem hlum daih zui a,tumah lah chu tho ngam awm hek suh,U Zohuaia kan va ngai tak em! Ani chuan a hlau therte awm si lo,In lam a kar thum ka hmuh loh chhung ai pawhin chumi zân a,U Zohuaia ramvak chu rei ka ti fe mai...!!
.
Rei fe kan nghah leh hnu ah chuan Mihring pen ri niawm tak kan hre ta a;Mahse,kan hlau ve miahlo thung...!!? U Zohuaia ngei a nih kan ring tlat tawh a ni.Chu ri chuan kan riahna buk chu a rawn pan ve zel a,kan buk zawnah chuan a ding ta ngei mai,mahse,U Zohuaia hmel alo lang chuang miahlo...!!! Kan thawm ve deuh hlut pawh a zuih ral leh ta tial tial a,a tawpah phei chuan tawng ri ngam kan awm leh ta lo.Chutah le!! Hlauh nak alai chuan kan Bûk chu sâwitu a awm tih hriat tak maiin a nghing ta luai luai mai a,Thing zai ho bûk hlui zet tawh pawh nise zanlai lai ah tunge rawn sawi peih teh lul ang!!? Mi pangngai chu annilo phawt,kan hlau tulh tulh a tumah inlukhup lo ngam kan awmlo!
.
Thawm a reh leh deuh hlek a,thianpa Rama chuan min rawn kheuh ru zeuh zeuh a,"Kawngkhar... kawngkhar saw" ati ru sû sû bawk a,bûk kawngkhar lam chu ka va en ve dèk dèk a...Awi ka nu....ka thiii..!!
.
Thla êng fiahlo ruai hnuai ah chuan kan bûk kawngkhar a mi tu emaw ding thim deuh mûk hi fiahlo ruai hian ka va hmu thei a,Chupa chu pa tawi deuh terh turh hi a ni a,a mit niawm tak pahnih sen dè thiang rual chuan kan mutna lam chu a rawn thlir leh vung vung thin a,ki ni awm tak pahnih pawh a neiin ka hria pawn lam a thla èng ruau avang chuan alang thei a ni,ka che deuh hrut chu a rawn hmu thei nge ni keimah chu mi rawn thlir ta kur mai a,ka râp ngei mài,ka tim ur ur a,ka hmul thite chu an ding er er mai,ka khua a sik dawn tlat..... Chutiang hunah chuan ka thiante bul a awm ai chuan kan Zawhte bul a awm a,In a awm daih mai chu ka chak et et zawk.!!
.
Keini aiin tawi hmel mahse kan hneh hauh lovang le,a melh ringawt ah pawh kan thaw a chham lek lek a ni si.Kan riahna hi a chenna alo ni renglo maw? Ramhuai nge niang Thlahrâng zawk le? U Zohuaia chu han awm se eng tin tak ti ve ang maw? A hlau ve tho angem le!? zawhna hlir chuan ka khat a,ka hlau bawk si,mu leh mal pawh ka neilo,thihdang daih mai chu kan duh dan vek a ni awm e,che ngam eih silo,thaw tha ngam bawk silo,inluhkhup tlat mai bawk si chuan hrehawm tak a ni!Hremhmun patè a ni ringawt mai...!!!
.
Chu pa lah chu kal sawn zai rèng a rello,a hawi kual hruk hruk reng a,a mit sen de ru mai chu a len kual ruai a,kan thâuah a man tlat tawh!Kan thi ang nge kan dam ang le!! Ka chhungte ka ngai vawng vawng mai...!!!*
.
Chutiang mai mai a rilru a insual buai reng lai chuan thawkleh khatah Silai a puak dur mai a,keini ho pawh chu phût leh te tuarh kan fâwm a ni ber,Ramhuai pa pawh chu a per zeuh a,a bo ta nghal a,.Silai kâp puak tu chu U Zohuai-a ani chiang mai!!,kan va han lawm tak em!! U Zova chu huaisen kan ti leh ta em em mai a!
.
Thenkhat anlo tap pur hman a,thenkhatin zun anlo cheh phung a,thawhchhuah zai erawh kan la rel ta chuang lo,U Zova lo lan hma chu kan thla ala muang zan lo pawh a ni maithei!!Mahse,U Zohuaia reng reng alo lang thei chuang lo!!,Bûk bul mai ah Silai kha puak niin kan hre si a,U Zova hi a inkap palh te a ni mai ang a...!!?tiin kan hlauthawng hlawm hle niin alang;Chutih a hnekin kan buk atanga hla vaklo ah chuan thawm ri danglam leh rapawm em em mai kan hre zui leh ta.Kan ngawi leh ta thap a,zan chu a reh leh ta ngawih ngawih a,chutiang karah chuan chu ri chu a chiang zual sauh a,thaw chhuak tha theilo thawri hruk hruk ri a ang ber mai le,chu thawm chu ngaihthlak a nuamlo tak zet a ni.U Zohuaia chu a inhliam a ni ngei mai...!!!?
.
Chutah le!!Àw danglam tak kan hre leh ta,mahse,chu erawh kan hlau ve miah lo,dar rimawi ri ang mai a ni zawk tlat,Kan U Zohuai sen em em-a àw ngei mai chuan,
.
"Ka thelh love,naute u lo tlan ru..."
.
Kan ri ta chel chul a,kan mutna atang chuan kan inperh tho nghal sang sang a,tunah chuan chhuah hmasak kan in chuh ve ngam ta !!
.
"U Zohuai,,, U Zohuaisen"
.
tiin alam pan chuan a biling a balang in kan tlehchhuak nghal chûk chûk a.
.
Awi karei leh!! Amak hle mai kan ramhuai pa chu meng pual ru chung chuan alo let ngût mai a,a bulah chuan U Zohuaia pawh intihtheih hmel ve ang reng takin alo ner deuh sung bawk a,a ni...kan ramhuai hmuh chiah chiah kha a ni...a ni chiang lutuk,a ki zum dan ah te chuan,ka chiang a ni....tunah chuan hlauh tur a awm ta lo,kan thaw a veng a,kan thla a muang ta huai huai mai !! U Zohuaia chu huai kan ti leh ta em em mai a,kan ngaisang sawt bawk a..!!
.
Tichuan hlim tak chuan kan thiam ang tawk tawk chuan U Zohuaia Saza kah chu kan chan ho a,kan thil tawn tam takte chu kan nuihna ti tamtu mai alo ni a,kan bûk sawi nghing luai luai ni a kan hriat erawh kha chu a lo dik ngei tho mai,kha Saza pachal kha kan Bûk ban ah alo in nawt naw naw a ni awm a,a hmul kai pawh kan hmu chhuak...!!! Engkim kan hriat chian hnu chuan kan hlauhna te pawh boruakah chuan an zâmral ta rih a ni.A ni U Zohuaia zarah ngei chuan...