ZORAM HARH RAWH,HINDU-NAIN A CHIM MEK CHE

Ni 10.5.'18 khan Aizawl Theological College- ah North East India Theological Association Biennial Conference neiin, Current Political Scienario in North East India, chungchang paper hrang hrang zir hona kan nei a.

Kan paper zir hona atangin kan Mizoram dinhmun ka thlir vel a, Hindu-na in min chim mek tih hai rual a ni lo.

Ni 4.3'18 Times of India chuan North East India-ah BJP chakna lawmin, "N-E: Land of Rising Sangh" tiin Head line-ah an rawn hmang kulh mai. India ram hi Hindu rama siam tuma inhlawm khawmte hi 'Sangh Parivar' tih an ni.  Rashtriya Swayamsevak Sangh (RSS) hi Hindutva kutke, an YMA tiin sawi ila, hriatthiam a awl ber awm e.

Kum 1998 khan Prime Minister AB Vajpayee in Nagaland Governor BP Acharya hnena a lehkhathawn a leak out hlauh mai a, a lehkhathawnah chuan, " Sangh Parivar member-ten Polo Bazar, Shillong-ah an milemte dahin, ramte an nei a,... hlawhtling takin an tum ber Lal Krista thinlunga an thir zum (trishul)-a vih chu an han hlenchhuak a ni" tih a ziak a.

Chu bakah Kristianna bawlhhlawhna(unholy Christianity) chu nuaibo a nih theihna turin, Kristian tamna State- Nagaland, Manipur leh Mizoram beih dan tur leh Assam, Arunachal leh Tripura-a Kristian awmchhunte beih dan tur ruahmanna siam a ṭul thu a ziak a, He lehkha hi Midday chanchin bu chuan a chhuah chuai chuai mai a ni.

MIZORAM-AH: Mizoramah chuan, hnam sakhaw bia inti, Nunna Lal Hman - te hi Hindu pawl hrang hrang, Vanvasi Kalyan Ashram (VKA),  My Home India, Heritage Foundation Forum etc ten, behchhanah rawn hmangin an thawk ho va. Anni hian hun rei tak atang tawh khan Mizo naupang phaia lehkha zir tur thawn te, Hindu lehkhabu thianghlim, Bhagavat Gita te, Ramayana bu te, Mizo tawnga letlingtein Sangh Parivar pawl thenkhatte an thawhpui a.

He thil hi tun hnaiah Social Media lamah hetiang hian vawrh darhin a awm a. "Tunlai hian naupang a thlawn a phai a lehkha zir theihna Thangkura (Mizo comedian) te khan an ti a, naupang phaiah an tir teuh tawh a....Nu leh Pa ten a thlawn a zir theihna chu tiin an fate an kal tir phal zel a... heng ho hi Hindu sikulah an kal tir a, an devotion zawng zawng an ti ve vek a ngai ngei ngei a.... hei hi Kristian ram bu hreuh an tumna a nia, nakin lawkah chuan kan naupang te hian..OM...Om... Ommmmm.. an la rawn ti ve ngei dawn a, puan eng bat in... fimkhur a ngai khawp mai RSS ho thil tum a nih hi kan hre der  si lo....Heng naupang te hi Hindu Sakhaw rawngbawl tu ten an kal lam leh an haw dawn in an mahni inah an dah leh thlap thrin a ni awm e..." tiin.

NUNNA LALHNAM CHHANLETNA : He thu theh darh avang hian Thangkura lam tangte chuan hetiang hian thu an chhuah ve bawk a. 

"Thangkuraten Vai ramah a thlawnin Hindu sikulah Mizo naupang lehkha zir tur an thawn thla țhin tih leh Thangkura chu Hindu ah a inlet tih thuthang lo awm hi..

India ram chhunga Tlangmite chawisan tumtu pawl Vanvasi Kalyan Ashram te hmalakna zarah Nunna Lalhnam(Mizo sakhua vuantu pawl pakhat) chuan Mizo naupangte  senso tlem zawka Phai lama lehkha an zir theihna kawng a hmuh avangin Mizo naupang țhenkhat chu an lehkha zirna tur buaipuiin Phai ram hmun hnih thum velah a thawn a. Hemi lam buaipui hna(incharge) lo thawk tur hian Nunna Lalhnam chuan an mi leh sa Thangkura nupui chu an ruat a ni. Thangkura te thawn thlak ni loin Nunna Lalhnam hmalakna a ni e.

An school luhna ho hi Hindu school a ni lo a, zirna School pangngai ve mai a ni. A enkawl tute Hindu sakhaw vuantu an ni mai.

Tin, Thangkura Hindu-a inlet anga sawi hi thu dik lo a ni bawk. Thangkura (B. Lalthlengliana) hi Mizo hnam sakhua vuantu niin, rawngbawlna kawngah pawh mi țangkai tak Puithiam hna thawk mek a ni.

Nunna Lalhnam hmalaknaah hian kum 2003 vel ațang khan lehkha zir an awm tawh a. Master degree zo te pawh an awm tawh. Tumah Hindu-a inlet an la awm lo a, an awmna sakhua leh kohhranah mi țangkai tak an ni mek hlawm" tiin.

THANGKURA AWARD DAWN: Nunna Lalhnam hian Thangkura hmathehah an hmang ni ngeiin a lang a. Amah Thangkura hi Nov. 10.2016 khan New Delhi ah KARMAYOGI National Award for social works and Social Awakening hlan a ni a. Award hian Trophy leh ₹.1,00,000/- a keng a. Engtikawnga dawng nge ni ang ?

AN SCHOOL LUHNA CHU: Engpawhnise, Thangkura a ni emaw, Nunna Lalhnam an ni emaw, an school kalnate chu HANUMAN PRASAD SATYANARAYAN PODDAR HIGHER SECONDARY SCHOOL te a ni a . India ramah Kristian School te chu fee to tak tak lo chuan a luh theih loh laiin, Hindu school a Free education lo chhawp chu hmanraw ṭha tak a ni reng a ni.

AN HMALAKNA A REI TAWH: Kum 1975 lam daih tawhah khan RSS te hmalaknain, heng School-ahte hian North East naupang an lo zirtir tawh, Hindu sakhua hi chu a zau a, mahni hnam sakhua chawisan duh apiang pawh an pawmpui thei mai. Tunah hian Arunachal-ah chuan, Hindu ni si lo, an hnam sakhaw modify-in, Kristian te tih dan zul zuiin, Biak inte an sa ve a, kartin zirtawp ni apiangin an inkhawm ve thin, chûng mite chu Kristiannaa hruai luh har berte an ni tawh. Chu sakhaw thar dintu chu RSS-te Pûm chhuak a ni.

Kum 2014, December khan, Hindustan Times-a Senior Correspondent, Furquan Ameen Sissiqui-a  chuan heti hian a ziak a, " Tunah hian HMARCHHAK mite rilru leh thinlung la tura indona chu a inpeih ta tih an zinga Hindutva thil tum hlenchhuak tura *RSS leh a sangawi zawnpui mi leh sa an pung ta tial tial hian* a ti chiang a,. Heng saffron mite hian an lungten em em Christiante hma lak dan an zir nasa hle ni tur a ni, ZIRNA HMANGIN AN THUCHAH FING TAKIN AN THEH DARH TLAT A NI" tiin.

GITA LEHLIN THUHMA: Nunna Lal Hnam hian Bhagavat Gita, Mizo tawnga an lehlin thuhmaah chuan, " Gita bu hi.. hnam damna tling thu hluin a khat ni berin a lang a...hnam chhanchhuah nan chuan a tul phawt chuan MAHNI CHHUNGTE THLENG PAWHA DO NGAM NUN NEIH A PAWIMAWH ZIA LEH THUTHLUNG HLEN CHHUAK NGAM NUN NEIH A TUL ZIA A LANG CHIANG HLE ... tiin an ziak kulh mai. Mahni chhungte ngei pawh do an hreh dawn lo a nih hmel.  Gita an lehlin chu, tuna Mizo zirlai an tirh thlakte hian an zir ve thin niin an sawi bawk.

NGAIH A VA TI THA LO EM: Hetiang taka hma an lakna hi, Hindu sakhuaa inhruai luh tumna a ni lo tiin sawi mah se, engtikah emaw chuan Mizo ngeiin Hindu sakhaw ropui zia an la hril pap pap hun a la thleng mahna, tuna Gita lehlin thuhma atang ngawt pawh hian, an rilru sukthlek chu a lang uar mai.

May 2-8, 2007 khan  Zozam Weekly, phek 21-22-ah VL Peka Chhakchhuak in MIZO SAKHUA VERSUS CHRISTIANITY a ziah chu, Vanlalchhuanawma'n fakselna a ziah-ah, " Mizo Sakhua vuan tur leh, Bible leh Kristianna phat tura Mizote sawmna a ni ber" a ti.

(https://www.mizoramsynod.org/mizo-sakhua-versus-christianity-fakselna-by-vanlalchhuanawma/)

Tin, tu Sakhua pawh thawhpui theiin an insawi a, hetiang mi hi an nih avangin, an zirlai tirh thlakte chuan, Hindu sakhua pawh rawn zawm haw mah se, pawi an tih loh hmel khawp mai.

POLITICS LAMAH:  Hindutva thil tum chu India mite hi sakhaw pakhat be tura hma lak a ni, Ram danpui Article 25 leh 30-na, sakhaw zalenna leh, minority ten zalen taka  school an din theihna nuai bo hi an tum ngar ngar a, danpui siam tha tur chuan, rolelna in pahnih, Lok Sabha leh Rajya Sabha a pass a ngai. Tunah hian rorelna in pahnihah BJP in seat hmun thuma thena hmun hnih an la chang pha lo, an pha thuai maithei

Kristian tamna Nagaland leh Megalaya-ah BJP seat hnih khat lek nei mah se, an MLA te pawisa tam taka leiin BJP thunun theihin sorkarna an siam hmiah mai.

Mizoramah hian kan politician tam zawk chuan BJP thil tum hre rengin, a sawi mawi zawngin campaign an nei a, an chet vel dan han thlir hian, Megalaya leh Nagaland te nen kan dang chuang lo vang tih hi ka va hlauthawng em.

Mizoram BJP party lah chu kohhran Upa hruai ngatin kan awm phawt a, kan conference- a kan sawihonaah chuan, Megalaya BJP party-a lutte chu, Kristianna vuan mumal lo ho an ni, an ti asin.  MNF lahin Megalaya sorkar thar lakluhnaah, an hotupa hial a zuk thawh thla a. BJP haw ber tura ngaih, Congress lahin Chakma ADC sorkarna siam nan BJP an thawhpui chu, thiam takin an sawi mawi a. ZPM Chief Ministerial Candidate, phone leak out-ah khan, BJP thawhpui hnial lo lam kha a lo lang bawk mah se Val Upa Council thununna hnuaiah, CM candidate-a puan a nih hma khan, ZNP chuan BJP an thawhpui loh tur thu an auchhuahpui kha a ni a, ka Mizo Kristian thinlung hi a lo nuar hman ṭhlelh a ni.

Engpawhnise, suma lei theih MLA kan thlang tling palh ang tih hi kei chu ka la hlau cheu va, Hindutva movement hian Zoram hi a chiah khawlo mek, kan riinna fiahna a lo thleng mek a nih hi. Kei chu ka Hindu ve lo ti eng ang mah ila, India danpui siam danglam hi BJP thil tum lian tak a nih miau avangin, BJP support MP kan neih ve vaih chuan. Tuna kan sawi mam hian awmzia a nei tawh dawn lo. Aw Zoram, harh rawh, Hindu-na in a chim mek che tih hi beng nei chuan hre rawh se.

➡️ Lalrinliana Colney