THLA HNIH DAN A VUN INLIP THIN

Tleirawl pakhat, Shalini Yadav, kum 16, chuan natna danglam tak mai a nei a, thla hnih danah a vun a inlip thin a, a vun inlip thin avang hian 'human snake' tiin an sawi hial a ni.
Hetianga a vun inlip thin avang hian moisturizer pawh a mamawh tam thin khawp mai, a vun a khir khawng loh nan!


Shalini hi an chhungkua an rethei si a, chuvang chuan inenkawlna tha pawh a dawng thei lo. A vun awmdan danglam avang hian school kalna tur pawh a hmu zo ve lo. Doctor-te chuan a natna hi Erythroderma niin an sawi a, vun natna chikhat a ni a, 'red man syndrome' ti te pawhin an sawi thin a, a tihdamna an la hmuchhuak lo niin an sawi a, hetiang vun natna hi khawvelah pawh hriat tur a la tam lo hle niin an sawi.

A natna hian a vun zawng zawng a fan chhuak a ni deuh ber a, a vun te chu a lo khir a, tichuan a khawk leh thin. A pianhlim atangin ni 45 dan zelah a vun hi a inlip thin a ni.
A nu Devkunwar chuan, "Shalini hian a nausen lai atangin natna hi a nei tawh a, doctor tam tak kan rãwn tawh a, mahse, tuman a tihdamna an la hre lo. A dinhmun hi a tha lo telh telh zawk a ni. Hetianga a vun inlip vel ka hmuh hian engmah ka tihsak thei si lo hi hrehawm ka ti ngawih ngawih thin, a na a ti thei em em bawk si.

A natna hi thihpui chi chu a ni lo nain, nitin zawi zawiin a nunna hi a laksak hret hret a ni ber mai. Khawiah nge kan kalpui leh ang a, tu hnen nge kan pan leh ang tih pawh kan hre tawh lo," a ti.

Devkunwar chuan a fanu dinhmun chu a khawngaih em avangin, a fanu tan dam reng pawh a hrehawm zawka a ngaih hial thu sawiin, "Damchhung nun hrehawm reng renga hman ai chuan thih daih mai a tha zawk hial ang," a ti.

Shalini hian nau pahnih, Sejal, kum 15, leh Price, kum 8, te a nei a, mahse, a naute hi chuan hetiang vun natna hi an nei ve lo. A nu leh pa te hi nitin inhlawh chawpa eizawng an ni a, a pa, Rajbahadur chuan, "Hetianga a piang bik hi a vanduai a ni. A ke ler atanga a chhip thlenga kâng tuar ang mai a ni," a ti.
Shalini chuan, "Lehkha zir ve te pawh ka duh, mahse, naupang dang ten ka hmel an hmuhin min hlau zel a, school atangin min chhuah tir. Kan chhungkuain keimah vangin kan tuar tawh.
Mahse, engnge ka tihsual bik? Hetiang natna hrehawm tuar tur hian eng sual nge ka lo khawih bik le? Dam ka duh a ni. In theih chuan min pui hram rawh u," a ti.
-the aizawl post