TAKSA HRISELNA ATAN CHINI

      A hma deuh khan hriselna atan Chini a that lohzia kan tarlang nual tawh a; mahse, tun tumah chuan Hriselna atana chini pawimawhna leh thatna bihchiang veleh thung teh ang.

        Thil reng reng hian thatna lai leh that lohna lai (advantages & disadvantages) a nei vek tih hriat a tha hle. Thil tha bera kan ngaih pawh hi han belh chian tak tak chuan that lohna lai engemaw tal a nei ve zel thin. Hetiang bawk hian Chini pawh hian thatlohna lai tam tak nei mah se, thatna lai tam tak a nei tho va chungte chu hetiang hian tarlang ila:



       Mihring taksa hrisel nan Chini hi a lo pawimawh khawp mai. Mi hresel leh taksa chak pangngaiah chuan Chini mamawhna leh tangkaizia a inlar lem lo mai thei. Mahse, taksa chau tak leh zawi tak tan chuan mi chhawk zangkhaitu tha tak a ni. Engtiangin maw?

1. CHAUH CHHAWKTU ATAN
           Hnathawh hah riltam chauh leh tam chhawl tuihal zawi chauh ngawih ngawih laiin chini han bar thin la chawpleh chilhin a chhawk nghal thei ang che.

2. THISEN KAL VEL SIAMTHATU ATAN
       Thisen hniam thinte tan chau ngawih ngawiha i awm chang a awm thei. Chutiang a nih chuan chini bar mai a tha a, thisen kal siamthain a lo pangngai veleh mai thin.

3. ZUNTHLUM TAN:
          Zun thlum sang chau ngawih ngawiha awm thin, insulin hmang tawh riltam chau ngawih ngawiha i awm changin chini bar a tha a, i lo harhleh thuai thei ang.

4. THLUAK TAN:
            Thluak hah lutuk leh ngaihtuahna mumal lova awm chang leh rilru bing chuk chuka i awm changin chini bar la i thluak ngaihtuahna a tuai tharleh thei.

5. NGUINA TIREHTU ATAN:
            Nguina (depression) neite tan chau zawi leh lungngai taka i kaikun laiin chini ei thin la i lo harhleh hawk thei a, nguina lak ata hlimna siamsaktu che a ni thei.

6. HLIAM PEM DAMDAWI ATAN:
         Pem thar leh hliam enkawl nan damdawi pangngai hman aiin chini ei thin hi a dam/hil rang zawka ngaih a ni. Chuvangin, hliam leh pem i neih changin chini bar mai thin la a tha ve hlea ngaih a ni.

     Khitiang khi chini thatna lai chu ni mah se, a hmaa tarlan tawh ang khan chini ei tam lutuk erawh a tha lova, ei loh tawp ai chuan i dinhmun azirin ei mai thin la, i zalenna hmang tangkai mai thin ang che.

-  Dr.C.Lalrampana