SABBATH KAN SERH LOH CHHAN

Sabbath serh leh Pathianni serh chungchangah hian inhnialna a awm fo thin a, inlak tak tak phei chu a har viau a. Sabbath serh lova Pathianni zawk kan serh chhan hi fiah lo kan awm takin tarlan a tulin a lang:

1. Dan kan zawm famkim theih loh avangin mihringte hi Dan anchhe hnuaiah kan tang a, _*kan aiawha Dan zawng zawng min zawm famkimsaktu Lal Isua'n engkim hneha a thawhlehna ni hi Isua ringtute tan ngaihpawimawh loh rual a ni lo*_.



2. Ni 7 ni hmasa berah Pathianin *_'eng'_* a siam a _(Gen.1:3ff.)_, Lal Isua, khawvel thim Entu pawh ni 7 ni hmasa berah _*thihna leh thlan thim rapthlak ber hneh zovin*_ a lo chhuak _(Mt.28:1; Mk.16:2; Lk.24:1; Jh.20:1)_.

3. Ni 7 ni hmasa ber hi Isua thawhlehna ni a nih vangin Tirhkohte hun lai atang khan *_"Lalpa Ni"_* tia sawi thin a ni a _(Kohhran thenkhat chuan 'Pathianni' ti lovin 'Lalpa Ni' tiin an hun ruatnaah pawh la ziak zel thin)_. *Chu niah ngei chuan* Johana pawh khan Patmos thliarkarah khan inlarna a hmu a _(Thup.1:10)_, Thupuan bu hi a ziak ta.

4. Ni 7 ni hmasa ber _(Lalpa Ni)_ ah chuan Isua chu a zirtirte hnenah _*(Thoma tel loh laiin)*_ a inlar a _(Jh.20:19)_, chutiang ni ah bawk chuan *_(Thoma awm ve laiin)_* zirtirte hnenah a inlar leh bawk _(Jh.20:26)_.

5. Isua thih atanga chawlhkar 7 _(ni 7x7= ni 49)_ a ral hnuah, a ni 50 na _(pentikos ni)_, *kar thar intan lehna, ni 7 ni hmasa ber chiahah van atangin Thlarau Thianghlim a lo thleng chiah bawk*. Chu niah chuan Judate kut hmang zo leh Sabbath hmang zo, Jerusalema la chamte pawhin mak ti takin an thlir a nih kha _(Tirh.2:5)_.

6. Kohhran ding tirte pawh khan *Isua thawhlehna ni, zirtirte a pawl harh thinna ni, Thlarau Thianghlim lo thlenna ni champha* chu an serh nghal thin a, Troas khuaah ni 7 ni hmasa berah Paula hovin chhang phelin an inkhawm a _(Tirh.20:7)_. Korinth khuaa Kohhranah pawh khan ni 7 ni hmasa berah inkhawmin thawhlawmte la khawm turin Paula'n thu a pe bawk a _(I Kor.16:2)_.

7. Heng thuziak hrang hrang atangte hian *_Kohhran din tirh atang khan_* Pathianni hi an lo serh tawh tih a tarlang bawk -

a) AD 100 vela Barnaba lehkha thawnah _*"...ni 8 ni chu lawm takin kan serh a....Isua thawh leh ni chu..."*_

b) AD 107-a Ignatius-a lehkhaah *_"Sabbath serh tawh lovin, kan Nunna a lo thlawh lehna ni, Lalpa Ni chu serh tawh zawk rawh u"_* tih a chuang bawk a.

c) Kum zabi 1-na tawp lama Didakhe ah _*"Lalpa Ni ah chuan inkhawmin chhangte phel ula... sualte thupha chawiin lawmthu te sawi rawh u"*_ tih a awm bawk a.

d) AD 111-113-a Bithunia Governor Pliny-a'n Emperor Trajana lehkha a thawnah "...an tana *_ni ropui bikah chuan_* inkhawmna an nei thin" tih a ziak tel bawk a.

e) Lyon khaw Bishop Irenaeus (AD 144-202) chuan *_"Lalpa Ni ah lo chuan Lalpa thawhlehna thupui lawmna inkhawm neih theih a ni lo..."_* a ti bawk a.

f) Justin Martyr-a Apology bu (AD 155) ah chuan *_"Sunday an tih ni ah chuan Kristiante an inkhawm a, Tirhkohte leh zawlneite thu ziak an chhiar a, thuhrilin a zui a, tawngtai rualna te an nei a..."_* tihte a chuang bawk.

g) AD 312-a Emperor Constantine-a Kristian a lo nih ve hnu khan Kohhran rorelna leh Sorkar thu chhuakin Lalpa Ni/Pathianni serh tura thupek a lo awm ta a, Elvira Inkhawmpui _(AD 306)_ chuan a thu a titlu ta a, a hnuah Laodikei Inkhawmpui _(AD 364 & 380)_ ah te an nemnghet leh ta a ni.

8. *"Thlarau Thianghlim leh keinin..."* ti meuha tang ngam, Jerusalem Inkhawmpuiah khan Sabbath serh hi Jentail Kristian _(Juda ni ve lo)_ te tana la phut tlat chu _*'thlahtute atanga an zawh tawh loh nghawngkawl inbahtir leh tumna, Pathian fin hnial kalhna'*_ a nih thu kan hmuh kha _(Tirh.15:10)_. Chu Inkhawmpui thu chu Thlarau Thianghlim pawhin a hriatpui ni ngeiin a lang si _(Tirh.15:28)_.

9. Kan Bible ah chuan *_"Chutichuan ei thu ah emaw, in thu ah emaw, kut ni thu ah emaw, Chawlhni thu ah emaw tuman sawisel che u suh se, chung chu thil lo thleng turte hlim a ni, a tak erawh chu Krista ta a ni"_* _(Kol.2:16,17)_, tih te;
*_"Nangni Dana thiam chan tumte u, Krista nen in inthen ta; khawngaihna chu in tluksan ta"_* _(Gal.5:4)_ tih te kan hmu a. *Sinai tlang Dan, thiam loh min chantirtu laka min tichhuaktu Lal Isua zawk entu tan chuan Lalpa Ni/Pathianni hi serh loh rual a ni love.*

10. Tichuan, keini chuan *_Isua Krista thihna hneha a thawhlehna ni, zirtirte a pawl tanna ni, Thlarau Thianghlim lo thlenna ni, zirtirte leh a tir ata Kristianten Lalpa pawl nana an lo hman, Kohhran kal zel ten an serh zui tak_* chu kan lo serh ve ta zel a ni.

*Kan zawh famkim theih loh Dan, Judate zawh tawh loh nghawngkawl chu inbahtir leh tum lo ila, Chawlhni Lalpa, Isua Krista hi neiin a zirtir dan ang hian nung ila, chu chu a pawimawh ber zawk e.*

- Rev.M.S.Dawngliana