KEIPUI CHEK HLUMTU PI ZADINGI LEH A SAKEI THAH DAN

Sakei(Keipui)a cheh hlum hunlai khan Pi Zadingi hi kum 26 lek a upa a la ni a. A fapa upa ber, Lalhmingthanga, thla thum mi lek a pawm mêk a ni.

An thenawm nupa te'n thingtuah phur turin an sawm a. Nausen pawmlai nei a nih avangin, a hmanhmawh chu an thenawm nupa te rual chuan kal ta lovin, a kal khalh ta zawk a.


A nau pawmlai chu thing hnuaiah mut tir in, thingphur tur chu a ek ta mial mial a. Thing 2 a êk zo țan mek tihah chuan, thawm engngemaw ri deuh hulh hulh a hriat chuan a beng a verh ta hle mai a. A hawi kual a, engmah hmuh tur erawh a awm lo! Thingphur tur chu eh zui zel a tum lai tak chuan, thawm ri deuh hulh hulh chu a hre nawn leh ta a. A awmna thlang kham chu a zuk en chiang a, sakei lu chin chiah chu a zuk hmu a. Sakei chuan a lo thlir reng chu ni in!

Sakei chuan a tanhmun a insiam rem sauh sauh a, vawi leh khatah a rawn zuan ta phut mai a.



 Chutia sakeiin a rawn zuan lai chuan, "Ka fapa chuan a dampui zo dawn lo a nih hi..." tih rilru pu chung chuan, a hreipui humlai chuan tha khur leh hlauhna hranpa nei lo chuan, Sakei lu ah tak chuan a chek ta nghek mai a.

A vawikhat chehnaah chuan Sakei chu thluak baw hawkin a let thal ta der mai a.

Hman deuh lai kha chuan Mizo pawl 4 zirlai buah a chanchin hi zir tel a ni thin a.

A hnuah pawl 6 Hindi zirlai buah zir a ni leh. Tun hnu hian a chanchin hi zirlai bu ah telh a ni tawh lova, kan thangtharte hian KAN MIZO HMEICHHE HUAISEN chanchin hi kan theinghilh mai loh nan, Sciatica natna rawn inentir a Aizawl a rawn kal lai chu remchanga lain, kawmna hun a insiam a.
A chanchin tawite a tawngkam chhuak ngei hmangin ka rawn tarlang thar ve leh e.

Pi Zadingi hi August 15, 1952 kum a piang a ni a.

Sakei hi 1978 kum khan Buarpui khaw daifemah a chek hlum a ni.
1980 kum khan huaisen lawmawm (Tangkapui/medal) SHAURYA CHAKRA chu Delhiah hlan a ni a. Pawisa fai angin thlatin Rs 40/-a dawn tel chu, kum a liam in tih pun ve zel a ni a. Tunah chuan thla tin Rs 3000/- a la dawng pha a ni.

Pi Zadingi hi tunah hian a pasal nen fa 5 nei in, an chhungkua hian Buarpui khuahah an cheng mêk a ni.

A sakei thah leh a hreipui chu Aizawl Museum ah tun thlemg hian hmuh theiha la vawnțhat a ni.