THE DIARY

Thlasik boruak anih deuh tawh avangin boruak chu avawt deuh vur tawh a,zan boruak chu athiang em em a,Vanah chuan Arsi an pe tuar mai bawk a.Mahse,lei lam erawh athim em em thung a,zan a rei tawh avang chuan mi tam zawk chuan varanda light an off tawh a,eng awm chhunte pawh chu tiauchhumin a bawh deuh chuk avang chuan a fiahlo hlawm hle a.Thawm hriat tur a awm tawh manglo a,ral hla taka truck tlan chik ri ruai ruai thinte chu a bengchhéng pawl anni a,Motor tlan awmloh lai taka wall clock chek ri tlek tlek kara Rawlthar tap leh faih faih thin chu a hriat theih hle mai bawk a ni.

Zirtea chu rilru na em em in a khum chungah chuan a thu a,a hmaa dawhkanah chuan a kut pahnih anghat a,ahma lam chu ngawi rengin a melh ngar a,a mit atanga mittui luangchhuak ngiai ngiai bakah a khat tawka a insut leh faih faih danah chuan a lungchhe hle niin qlang a, chutia lungchhe taka atah chhan chu tuman anla hrelo a ni.A hringnun zinkawng hahthlak leh hrehawm takte chuan Zirtea chu lungchhe takin atah tir zawk em ni ang nge thildang vang zawk ni ang.A hunliam tawhte chu thlir kir pawhin tahpui vawng vawng tham a nisi a.

Zirtea hi a Fahrah ve hle mai a,Nu leh Pa a nei tawh lova,khawvelah hian chhungte tia han sawi tur pawh a nei ve lo a ni.Putar pakhat in a enkawl seilian a.Zirtea nu hi Zirtea pian hian a boral nghal a,chu chu apa in a tuar thiamlo hle a,ataksa pawhin atawrh phah ta thuai a,anu boral hnu kum rei vaklo ah aboral zui ve ta a ni.

Zirtea nu leh pa te hi nupa inngai chi ve tak anni a,anu hi nu zaidam tak mai a ni a,apa erawh pasaltha ramvachal tak a ni a.Mahse,anupuiin aboralsan tak thut ah chuan a ramchhuak ngai meuh tawhlo a,chhuak thei dinhmunah pawh adinglo thuai a ni.

Tichuan,apu tar ve tawh tak nen chuan harsa takin an khawsa ve tek tek a.Harsa tak chungin lehkha pawh azir ve tang tang a.BA a chhuah kum chiahin a result pawh hrevé hmanloin apu chuan a boral san ve leh ta a ni.

Apu in a boral san ve leh zel avang chuan Zirtea nun chu a khawhar em em mai a,a hrehawm ngawih ngawih a ni,he khawvelah hian mal ngawih ngawihin a inhria a,han beidawn rum rum a,intih hlum maite chu a duh ta fo mai a.A nun chu a beidawng ve em em thin a ni.Mahse,apuin afuihna pakhat,"Engpawh i chungah lo thleng se,Beidawng ngai suh..Beidawnna hi Sual hmanrua hlauhawm tak a ni." atih thin chuan ati chak ve hram hram chauh hi a ni ber tawh a ni.A hmalam a thlirin thim mupin a hmu a,beisei tur awm tawhlo te chu beisei mai mai ni teiin a in hrefo thin a,rilru buai nuaiin hun leh kumte a chhiar chho ve mek a ni.

A pu boralna pawh kum thum zet aliam leh ta a,Amah chauh chuan chu In tereuhte ah chuan Khawhar takin a khawsa ve bek bek zel a,azirna lam erawh a chhunzawm thei talo a ni.Mahni a awm leh khawharte chu ngaiah aneih chhoh tan mek lai chuan a nun tidanglam vek theitu mi pakhat a tawngve ta hlauh mai a.Amah avang chuan Khawvelte chu a hmu thar ve leh thei ta chauh a,An khaw tleirawl pakhat Remremi a ni a,a hmel athain a pian a nalh hle a,mipate duh zawng tak tur chi hi a ni a.Amah Zirteà pawh Rawlthar chhuak hlawl a ni a,a hmel atha hle a,amah alian ve bawk a,an inhmeh dun hle a ni.

Mahse,Zirtea hlimna chuàn rei tak adaihlo,athiannu nen chuan an dinhmun a inthlau lulai em a ni.athiannu chhungte chuan namenlovin an duhlo a,nasa takin pawhthen antum reng a,an inkar tichhe tur chuan beidawn reng reng antumlo a ni.Engtikah mah an innei thei tak tak dawn chuanglo ni a hria in A hmangaih em em chu kalsan mai tha zawkin a hre ta a.Mahse,harsa ati hle a,chumai bakah Remremi chuan a then thei silo a ni.

Chutiang chuan hun harsa tak chu an paltlang dun zel a,inthlah lovin rinawm takin hun an hmang dun zel a,Remremi chuan Zirtea dinhmun harsa tak chu a hriat thiam pui hle niin alanga,a chhungten an tih dan tam takah pawh Zirtea chu luhlul chhuah tlat a,dawh hram hram zel tur pawhin nasa takin a fuih ve thin a ni.Hetiang ang taka hmangaihtu atawng ve ta hi Zirtea chuan apu hmuh leh hriat ve atan a it hle a,,apu chu a ngai thin hle a,chhungril a hlim ru veng veng siin alungte chu a leng leh veng veng thin a ni.

Kum avei a,Zirtea te pahnih pawh harsa tak chungin anla inkawp ve reng a,Zirtea hi rilru paukhauh ve tak a ni a,a retheihna zozai te chuan huaisenna leh tumruhna a pe niin alang a,a thiannu chhungte pawh chuan duhlo viau mahse,abeidawng duh bik chuang tawhlo a,neih ngei tumin a bei vé tang tang a ni.

Rilru chhungril taka hlim ru veng veng leh thlamuang taka a awm mek lai chuan a nun her danglam vek thei a tawng leh ta,Lungngaihna leh manganna chuan Zirtea chu a kian san ve thei tak tak lo a ni. Remremi chuan Zirtea chu a then leh ta thut mai a.

Remremi chu a chhungte chuan an hmin thei ta a nih pawh a ring mai a ni.Remremi'n,"Innei pawh ni ila engnge kan ei ang,nangmah pawh i inchawm zo ngawr ngawr si a,chhungte han belh ik tur pawh inei lova,ka chhungte hian an duhlo em che a ni,ka nun hrehawm leh rethei taka ka hmang tur hi an hmu ngamlo a ni,nang min neih tir ai chuan min len tar tir thak pawh an duhzawk a ni." tiin thudik taksi,hnehsawh taka amah hrethiam ve em emtu ni a alo ngaihin ahan tihkhum ta mai chu,Na ati vawng vawng a,tawrh thiam har ati hle a ni.Chu tawngkam chuan Chona nasa tak Zirtea chu ape a,tih vak ngaihna erawh ala hre rihlo a ni.Hrehawm atiin athinrim zawk hial a,buma a awm chu ana a,a zak bawk a ni.Engtinnge bumna mitmeng verther tak chu Zirtea chuan a hmuhhmaih tlat theih chu mak ati a,a leh mawl hlein a inhria a,a hmangaih leh a rin luattuk vangnge ni ang Remremi chuan alo hmangaih ve tak tak zawk?

Chu chu aring ngam silo,Rilru mumal pawh apu theilo,abing mup mup a,a khawhmuh chu a thim ruai a,a tliak hnawp a ni ber e.

Zirtea chu ahlimna ber laksak ani leh ta a,khawvel nun hmachhawn thei tura chakna pe a,nawrkal thintu,amah vanga khawvel nuam atih phah ve thin em em,amah a inhmangaih aia nasaa a hmangaih zawk,a duat ngawih ngawih leh a rin em em in a phatsan thut chu a â lo chauh a ni.A chunga thil lo thleng chu mumang mai nise Zirtea chuan ati hle a.Mahse,chutiang chu a nisi lova,Chu zan khawvawt vur pawh chu hrechanglo lekin lungngai takin a khumah chuan a thu reng a,Zan hnih zet hetiang hian a tlaivar tawh a ni.Atan chuan Vanpui a chim a ni a,a mut a chhuak thei ve nganglo a ni,a chunga phurrit tak lo thleng hi Zirtea tan chuan a rit lua a ni.Tichuan,Mittui nen hun lehni a chhiar tan leh tak tak tawh dawn a ni.

Zirtea chu ngawi rengin Khumah chuan ala thu reng a,a suangtuahna ramah chengin theihtawpin arilru lakpen tum ve a,thil tamtak angaihtuah a ni,an tunhma nuna a pu nen an hlim thin zia te chu amitthlaah alo lang uar uar a,apu nen an sulhnute chu nimin ami ang maiin a suangtuahna ah anlo lut zung zung a.Thil hriatchhuah thut nei ni awm takin Zirtea chu a han thu ngil deuh hlek a,ngaihtuah ding tak nei ni awm takin reilo te chu cheloin angawi leh deuh dat a.

Zirtea pu chuan thirbawm awmkhauh zet,engtiklai pawh a Tala a kalh tlat reng mai anei a,chu bawm chu a roh em em a,a chhan pawh nakin hunah itan ala tangkai dawn vang a ni.i ta tur a ni a.Mahse,kum 20 itlin hma chu ka ta a ni rih e,ipa hnutchhiah che a ni a,chutianga ti tur pawh chuan ipa chuan min chah bawk a ni,chuvangin kum sawmhnih itlin hma chuan a hnaih pawh hnaih suh ang che,tiin apu chuan a hrilh nghe nghe a ni.Chu bawm hawnna Chabi pawh chu engtiklai pawhin a apu chuan a awrh reng thin a ni.

A thih dawn ah pawh chu bawm chauh chu asawi kha a ni a,Bawm chabi pek pah a,"Bawm kha hawg .." atih lai meka aniin,"Kapu hahdam rawh bawm chu ka hawng lovang,i thu ang zelin ka ti ang."tia apu thusawi alo pawtchat ta kha,tunhnu a Zirtea'n angaihtuah letin bawm kha hawng mai tawh tura tih atum nih a ring ta zawk mah a.A chhungah chuan enge awm hriat a chak thei hle thin kha a ni.Tunah chuan kum sawmhnih atling tawh bawk a,apu thuchhiah tipuitling turin dikna a nei ve tawh a ni.Chu chuan Remremi nen an inkar boruak atang pawhin a hruai bo thei ber a ni ang,a hmel pawh chu tlemin adanglam deuhin a hriat tawh a.

Muangchang lovin athutna atang chuan athova a khumhnuai atang chuan bawm killi nei dum ren run,tala hlui leh lian zet mai inkhai ruang mai hi a hnuk chhuak ri ta hruih hruih a.Dawhkan chungah chuan a han nghat leh tete a,chutah a khum sir a thingrem chu a hai ruk ruk a,apu in a thih dawn a apek,Chabi hlui tawh tak mai La sen uk hlui zet a khai chu a rawn khai chhuak va va a.Hmanhmawh takin bawm kalhna chu a hawng chik ri ta ruai ruai a.

Enge awm ang rindan pawh Zirtea chuan a nei hranlo a.Mahse,a hmu chak em em lawisi a ni,bawm chhungah chuan engemaw puan a fun thil pakhat chauh hi alo awm a,Zirtea chuan chu thil chu a han phelh a,Lekhabu tereute leh chhah vak lem lo alo ni a,akawm chu savundum a siam a ni a,ahlui hmel tawh in,a phekte pawh chu arei tawh avangin an eng deuh phut tawh a.Mahse,a thuziak erawh ala fiah tha hle thung a,diary bu niin alang a,apa diary anih Zirtea pawh chuan aring thiam nghal mai a.

Lehkhabu chu a han keu a,phek hmasa berah chuan,"Ka fapa he lehkhabu hi tuman an chhiar ve tur a nilo,ipa in itana ka thil tihsak theih hnuhnung ber tur che a ni,i pawm ngei ngei tur a ni.

Kum sawmhnih itlin ka lawmpui che a,nangchu damreng ang che.

i pa"

tih hi alo inziak a,apa kutziak chu a thlir vawng vawng a,a lung chu a leng thar hle a,a mittui chu a parawl hman kiang mai bawk a,lehkhabu chu a han keu leh a,thu inziak chu a han chhiar tan ta a.

Pasaltha ka ni a,sa pawh tam tak ka kap a ni.Ka nupui duhtak nen hian inngaiin inthlahlel viau mahila ka pasaltha rilru chuan ram lamah min hnuk lut leh nge nge thin a.Ka nupui chuan kan fa hmasa ber tur chu apai tan a,a raino thil rawp chuan Zawng sa a ei chak tlat mai a.Mahse,nau insiam lai chu upaten anserh thin avang chuan ka ramchhuak duh rihlo a ni,chhuah chu ka chak etet a.Mahse,khuanu ka zah a,kan fa lo piang mai tur tan chuan ka insum hrwm hram a ni,ka nupui chu ka khawngaih em em a,Ramchhuah theih thuai thuai chu ka nghakhlel zek zek tawh a ni.

Thla pawh aliam ve zel a,ka chak ang ngei chuan ramchhuahna hun tha chu ka nei thei ta a,phur em em in ka silai pu vauh vauh chung chuan Zawng veh tur chuan ka chhuak ta a.Mahse,ka beisei angin Zawng kah tur ka tawng mai ta hauhlo mai a,tum thum zet mai Zawng veh chuan ka hlawhchham ta der mai a,ka bei pawh a dawng ve deuh tawh a ni.

Nikhat chu kan fa hmasa ber pian ahun teuh tawh tih ah hian ka inngaihtuah tlawmngai ani teh chek ang chu,abakah ka nupui chuan ala ei chak reng tho bawk si tiin Zawng zanriak veh tumin chawhnu thlang her bawihah chuan chhuah zai ka rel leh ta nge nge a.Ka nupui duhtak chuan chumi ni ber kher chuan chhuaklo turin min ngen lawm lawm a,nau pian a hun tawh si a,a pianlai a awmve turin min duh a,min mamawh a ni,Mahse,enginnge min mawlh tlat ka hrelo,ka kal lui ta tho a ni.

Zan thimhlim det det ah chuan vanneihthlak takin Zawng rual zan riak tur chu ka hmu fuh ta hlauh mai a,Uluk tak chuan ka veh them them a,Ngaw hnuai ah chuan khua chu a thim hle a,dumde a leng neuh neuh mai a,mit anti vai mum mum thei a ni.Zawng pachal lian zet chu ka hmu fuh ta hlauh mai a,,ka light avang chuan a mit avai nge tlanchhe miahlo chuan chiang fahranin minlo enkar mai a,light chhun zawng a a mit de thiang rial mawi tak mai chu ka nupui hmuh ve atan ka it ngawih ngawih a ni.

Ka nupui eichak em em laia ka kap theilo khan minti thinur hle a ni ang,khawngaihna tel miahlo chuan ka kap thla ta tawk mai a,ka thlang lawk hnim pik karah chuan atla thum dut a,adang pawh ngaihven tawh lemlo chuan chulam chu ka pan ta nghal a.Ka rinloh deuh maiin Savawm no ka pal chhuak hlawl mai a,a pui lian leh kawlh zet mai chuan zan thim tham hnuaiah min um ta chiam mai a,amak khawp mai kha Savawm luhlul zia kha aw amak tih hial khawp a nasa in kan in um a ni,ka hma zawnah a rem dan angin ka tlan zawr zawr a,Savawm lah chuan min um ve ngat ngat tho mai a.Mahse,beidawng duh hauhlovin ka tha chu sawmkhawm tang tangin ka tlan lui hram hram zel a.Nakinah Chuan chu Savawm chu a beidawng ta nge nge a ni ang,min um chu bansanin ading vut a,i nhrosa dum dum chungin a no dahna lamah chuan a kir leh ta a,hla tak atang pawhin a thawm chu a hriat theia,,Savawm lian leh kawlh tak a ni.

Ka chau hle a,Savawm akir leh tawh tih ka hriat chuan kalsawn leh zai pawh ka rello,ka chau hle a,ka awmna chu hmun awihlai tak a nih avangin tlema rual rem lai zawngin chhak lamah chuan ka vak chho a,thui pawh ka chholo hmunzawl,ka mutna leng tur lek chu ka hmu thuai a,ka bawk thlawp a kalo muhil zui ta a ni ang,ka harh leh meuh chuan zing sava anlo chiar nak nak a,tiauchhum awm chuk avang chuan Ni chu ala langlo a.

Ka awmna chu khawi hmun nge hriat tumin ka hawi chhuak thuai a,mahse,ka hre mailo a ni,tlang dung thla awih lutuk silova inphah thla zui mai hmun ah ka awm tih chiah ka hria a,lungpher deuh hlir inphah a ni a,thinglian pawh a awmlo a ni,perhte buk mai mai a awm nual a,Chulai ngaw kar si a,hmun fai lai chu kala hmu ngailo a,amak pawh ka ti rilru hle a.Ni lan hma chuan khawchhak leh khawthlang pawh ka hre thei rihlo ni.

Ka riahna zawl te reuhte atang chuan Savawm lêt lehna lam nia ka hriat chu pan ka rilruk a,a chhan pawh Savawm hnu chhuiin Ka silai leh ka Zawng kahsa te chu ka hmuh leh mai ka inbeisei a ni.Luhlul chhuah tumin Savawm hnuchhui let ka tum a ni.Luhlul leh luhlul chu kan intawng leh mai thei a ni,zanthimah ngawt ai chuan chhun engah chuan ka huphurh bik vaklo a ni.

Chutia ka han che sawn deuhah chuan ka awmna chu bûk deuh luih hiàn ka hria a,chumi rual chuan engemaw ri hrawih ka hre bawk a,thirinnawk ri ang berin ka hria,ka mutna zawl zimte hnuaiah chuan engemaw chu a awm tih ka hrechiang ta thuai a,ka chempui chuan lei chu ka cho ta a,thuklo te ka lai tihah chuan Thir awmkhauh taka siam bawm ka hmu ta mai a,vanneih thlak takin chu bawm chu alo inkalhlo hlauh mai a,ka han hawng chu kala hmuh ngai reng reng loh thil ka hmu ta.Nuih tur nge tah tur ka hrethiamlo hial a ni.Bawm chu ka han chawi chhuak a,arit em em mai bawk a,a hnuaiah chuan bawm dang alo la awm a.chulai hmunah chuan bawm thum zet alo inchhuang a,ka lawm dan chu pui tak a ni.

Chutiang anga tam Pawisa tam chu mumangah pawh kala hmu ngailo a ni,bawm zawng zawng chu pawisa in a khat tlat a,amak ka ti em em a,engtia chulai a poisa chu lo awm nge rindan pawh ka neilo,Mizoram buai lai vela sipai ho dah thuhruk a nih chu ka ring ta ber a ni.

Poisa leh bawmte chu angai ang thlapin ka dah leh ta a.Tichuan,Rilru chhungril a hlim em em in kan In lam ka pan ta zawk a,Ka silai leh zawng pawh nidang atan ka khek ta hmak a.Ka nupui ka hrilh hunah alawmzia tur chy ka hmu chak a,han barakhaih vel dan turte chu ka ngaihtuah lawk a,keimah chuan ka nui leh hak thin a,chhungrilah ka hlim a ni.

Pasaltha ramvachal ka ni a,karloah ka ram chin hriat chu ka thleng thuai a,ka kalna chin chu uluk takin ka chhinchhiah bawk a,In thlen vat vat a,ka nupui hrilh hlan chu ka nghakhlel ber a ni,tunah chuan Mihausa tawntaw kanni tawh si a,kallo tur a min ngen lawm lawmte kha ava inchhir leh dawn si em tiin ka nui ruh ruh a,ka kal thuai thuai mai a ni.

Khawchhung ka luh chuan kan In kawt a mi zi nuk nuk chu ka hmu thei a,ngaihtha vaklo chungin hmanhmawh takin kan In lam chu ka pan nghal a.Ka thil hriat chu avan rapthlakin avan na em!!

Ka nupui duhtak chuan minlo kalsan fel chiah a ni. Kan fa hmasa ber chu damtha takin min hrin sak a,amah pawhin hmuve hmanloin a boral zuita a ni,ka hlimna leh lawmna zawng zawng chu vawilehkhata vawmbo ang duak a nita a ni.Mahse,fapa tal minla pek avangin Pathian hnenah pawh ka lawm a ni.A hming pawh keimah ngeiin ka saa ka nupui hmangaih em em hming chawi chuan afapa hming ah Lalnunzira ka sa ta a ni.

Ka fapa chu nausen buchip mai ala nisi a,kan thenawm pitar leh putar fel takte chuan min enkawl sak chawt a,fanau a malsawmlo annih avang chuan ka fapa chu min duatsak hle thin a ni.Anni nupa chu kan chhungte neih ve chhun a ni.Ka thuruk engkim ka hrilh bawk a ni.Tichuan,ka fapa nang enkawl a chawi dam tur hian theih tawp kanlo chhuah alawn,hlim takin i nun hmang tawh ang che. Kan mamawh tur tlem la in Poisa te chu hmun himah ka phum vek a,chu hmun chu i pu in ipa thihna hmun tia a hrilh thin ngei che ka ring a,hrilhhriat ngaihna che kan hriat dawn siloh avang leh kum 20 itlin atan chauha ti ka ni si a,chumi thleng chu kan dam thleng ve kher awm silo a,i theihnghilh theihloh leh i hriatreng theihnan dawt kan phuahchawp ta mai a ni min ngaidam dawn nia.

Heng pawisa zawng zawng hi ita a ni a,tangkai takin hmang ang che.

A bak chu i pu in a hrilh vek tawh che kha...

Chu thuziak a chhiar chuan a hmel landan ngawt pawh chu a tidanglam chiang kher mai,lungngai hmel chu hlim hmelin a thlak tawh a ni.a hmangaih em em Remremi chu a mitthla ah lo lang zawk zawk thin mahse a thinlung hmun a pe thei tawh biklo w ni.A thiannu rintlak loh tak nen a an boruak vel atang chuan a rilru chu hruai boin a awm chiang hle tawh a ni.

Chumi zan chu Zirtea Muthilh theihloh zan thumna chiah nimahse achhan erawh thildang vang a ni daih thung tawh a ni.
(PhoeniX)