HRIATNA DANGLAM

( Film pakhat ka en a. A film hming chu in hre tho ang. Ka ngaihtuahna chu he khawvel piah lamah hian a thlawk chhuak ta a. HE thawnthu hi ka han ziak ta a ni)

I
Tuk dang ang bawkin Hriltea chuan thawh a hai leh ta. Zing dar kua leh a chanve-ah sikul tan tur a ni a. Tunah zing dar 8 leh a chanve minit sawm laiin a pêl tawh. Inphih fai, chaw ei, sikul uniform hak, engkim mai chu sikul thlen hmaa tih tur vek a la ni si. Dar 9-ah chiah an in kawtah an sikul bus a rawn ding ang, second 30 chiah a ding
dawn bawk, chumi chhûnga a lut hman lo a nih vaih chuan ke in an sikul lam a pan a ngai ang, a hun takah sikul a thleng hman lo ngêi bawk ang, chutiang a nih chuan a chungah eng nge lo thleng ang lê? an class master Sir Zidinga chuan class a lak chhûng zawng dawhkan chungah a din tir leh ngei ang.


“Hrilte, sana kha en teh, i tlai leh a nih vaih chuan i nasa lo nasa ang tih ka hrilh lawk a che. Uniform kha ha nghal vat la, rang takin chaw hi rawn ei rawh.”

Pi Sangzuali, Hriltea nu hi PWD-ah MR in a thawk ve a, kum ruk liam taa a pasal boral tawh aiah hotute duhsakna dawngin he hnaah hian an thawh tir ve a ni. Mizo nû ah chuan tê chhe lo pawl tak a ni ang, fit 5’7 vel a ni a, a in uluk lo hle nachungin a sam leh a vun te chu khuanu siam fuh an sawi ang maiin a nung sar reng mai a ni. Tunah hian a kum 40-na a hmang mek a, duh ngat se chu a fapa nena châwm zo var var tur pasal pawh la thing thei tur khawpa hmel\ha a ni. Pisa a an thawhpui thenkhatte pawhin Nuthlawi Hmel\ha-i tiin a hming lem an phuah sak ngat rêng a ni.

Dar 9:1 a rik chiahin pâwnah an sikul bus lo thlen hun nan hman tumin Hriltea chu a tlan chhuak a; mahse, bus chuan a lo tlansan hman tawh. Hrem hmabak tih inhre chungin sikul lam chu kêin a pan hnak hnak a. A nu pawh an office lam panin Hriltea chhuah hnu lawkah a rawn chhuak ve bawk.

Hriltea hian tunah a kum 12-na a hmang tan chiah a. Pawl 5 a zir mek a ni. Sikul a va thlen chuan a thlan a tla phung tawh mai, tlai loh hram tumin theihtawpa chakin a kal a, a chângin a tlan titih a; mahse, a tlai ta tho tho a ni. First period an lak chhûng zawngin an Sir Zidinga chuan dawhkân chungah a din tir tluan thak a. Ni dangah pawh heti ang hremna hi chu a lo hmachhawn fo tawh avangin Hriltea chuan zah-ah pawh a la lutuk lo. Nuam erawh a ti hran lo. Second Period chu English a ni a. An zirtirtute zinga a ngainat ber leh amah pawh duhsak bertu nia a hriat Miss |ani subject a ni.

Dar a ri a, first period a zo ta chiah, Hriltea chu a thaw huai a, dawhkan atang chuan a chhuk thla nghal a; mahse, Sir Zidinga chuan, “Nang kha, tu nge dawhkan chung atang khan chhuk rawh ti che a? in miss Tani’n a phal a nih chuan i chhuk thei chauh ang,” tih hmuk pahin class room chu a chhuahsan a, naupang dang chu an nui hak a.

Miss Tani chu second period la turin class room-ah a lo lut zui ve nghal zat a, zirlaite chu, “Good morning Miss,” tiin an lo ding siau a. “Good morning sit down,” tiin zirlaite chu a han chhâwn a, midang zawng chu an thu nghal mai. Hriltea erawh chu dawhkân chungah chuan a la ding vâng a.

“Hrilte, ti nge dawhkan chungah khan i din reng a?” tiin Miss Tani chuan a han zawt a.

Hriltea’n a chhân hmâin zirlai naupang dangte chuan dawhkân chunga Hriltea din chhan chu an lo hrilh sap sap a. Miss Tani chuan nui sak chungin, “Awle, tunah chuan i chhuk thei tawh ang,” a ti a. Zirlai an zir tan zui ta nghal a.

Miss |ani hmingpum chu Krostandiki a ni. Kum 20 chuang zirtirtu hna a lo thawk tawh a, zirtir dan a thiamin, India ram pum huap leh Mizoram pum huapa zirtirtu \ha bik chawimâwina pawh eng emaw zat a lo dawng tawh nghe nghe a ni. Zirlai tumahin a zir tir hi an ning ngai lo. A bik takin Hriltea ngat phei chuan Miss |ani hi a duh zual bik. A subject (English)-ah phei chuan an class-ah mark a hmu \ha ber deuh ziah a ni.

Second period a zo a, third period-ah chuan maths an zir ve thung, an maths zirtirtu hi south Indian lam mi, Mizorama kum 10 chûang zirtirtu hna lo thawk tawh a ni, Sir Tete-a tiin an ko mai thin, zirlaite zingah a south Indian hming hria an awm lo. Mizo tawng pawh thiam tak a ni. Miss Tani ang bawka zirtir hna lama tui tak, naupang han zirtir dan vêl pawh thiam tak mai a ni.

Nimin lama home work a pek an tih leh tih loh endikin a buai hle. Hrilte-a chu tlar hnung ber dawttu tukverh awmna bûla thu a ni a. Sir Tetea’n home work a endik mek laiin Hriltea chuan a bula tukverh inhawng atang chuan pâwn lam a va thlir a.

An sikul hi a changtlung thawkhat hle a, volley ball leh basket ball khelhna pawh an nei hrang thlap nghe nghe. Hriltea thutna bul tukverh atang chuan basket ball khelhna chu chiang takin a lang thei a. Mipa, kum 19 vel hmelpu, hmai thi hnuang mai hian amah chauha basket ball a khêl lai hi a va hmu a. Chhun chawlh a la nih loh avangin inkhelh phal a la ni hauh lo.

A hmu sual palh mai mai a nih ringin a mit a han nuai a, a han en nawn leh a; mahse, a hmuh ngâi chiah chu a va hmu leh ta tlat mai.

Chalk-in a châlah a rawn dêng fâwk a, Hriltea chu a harh chhuak zawk a, zirlai ngaihsak lova pâwn lam a lo thlir avangin an sir chuan chalk-in a rawn vawm a ni tih pawh a hre nghal mai. Naupang dang chu an nui ham ham a. Rei lo têah dar a ri zui a, chhûn chawlh hmâin fourth period chauh an bak ta.

Maths zirtirtu Sir Tetea’n class room a chhuahsan hnuin Hriltea chuan tukverh lam chu a han hawi chhuak leh a; mahse, basket ball court ruak mai bak chu hmuh a nei lo. A rilru a nuam lo hle a, a thil hmuh kha a mit vai naran mai mai chu niin a hre lo. A finfiahna tur erawh a nei lo.

Fourt Period chu social science a ni, subject zawng zawnga Hriltea nin ber a ni. An zirtirtu Sir Tlana pawh chu a ngainat zâwng a ni hek lo. Zirlaiah a rilru a pe thei tawh lo, hrem leh a hlauh avangin ngaithla uluk hle niâwm takin an zirtirtu chu a en kar a; a thusawi erawh hriat a lawi a nei miah lo. Dar a rik chuan hnar a hlit phawi ang huai a ni. Chhûn chawlh a ni zui ta nghal bawk.

Naupang thenkhat chuan an tiffin-a an chaw paite an ei a, Hriltea erawh chuan thildang a ngaihtuah thei lo, hmanhmawh takin basket ball khelhna lam chu a pan phêi nghal vat a, nichina mi pakhat hmai thi hnûang mai amah chauh a helai hmuna basket ball khêl a hmuh kha a hmuh sual mai mai nge, thil tak tak tih hriat tumin basket ball court chu chik takin a han en kual a. Sûlhnu, pheikhawk hniak emaw thisen emaw tal hmuh a inbeisei ru deuh a ni. Mahse, duh anga a en chik hmâin high sikul mipa ho in field chu an rawn luah zui ta nghal mai si a, lungawi vak lo leh helhkam nei ru teuh chungin basket ball khelhna chu a chhuahsan a, chhun chawlh apianga a chawlhna thin volley ball khelhna thlang deuh a thingkung lianpui hnuaiah chuan a chaw pâi te ei tûrin a kal ta a.

II
Zirtawp tlai a ni, chawhnu lamah infiamna hun rei lo tê an hman hnuin sikul chu an bâng zui nghal a. Hriltea chuan sikul bus-a chûan a han tum deuh uk a; mahse, a la hma tho bawk a, in-ah a nu a la awm dawn chuang si lo, kea haw chu a thlang ta zawk a ni.

Zarkawt traffic point a pel fel chiah tihin, mi lo inbawr khawm deuh hut hut hi a hmu a, tawh sual tawk an awm a ni ngei ang. Hmanhmawh takin mi punkhawm na lam pan chuan a tlan phei a, a rin ang ngêiin tawh sual tawk chu an lo awm tak tak a, nula kum 20 vel hmelpu hi taxi-in a chil a ni.

A lan danin taxi chuan a su thlu phawt a, chumi hnûah a chil zui ta ni ngeiin a lang. Nula awm bawr chu a pherh deuh nuai a, a thi chiang hle tih chu hai rual a ni lo. A bul velah chuan thisen tharlam tak hi a luang kawi zuih a. Rei lo têah ambulance a rawn thleng a, ambulance a\anga doctor leh nurse lo chhuak te chuan mipui chu kal kiang deuh tura ngênin, ‘Khawngaihin kal kiang deuh teh u, tih theih a awm tawh chuang lo,’ tiin an au lauh lauh a.

A thil hmuh chuan Hriltea chu a nghawng nâ kher mai, a tha a khur dawt dawt a, an sikul bus-a a lo haw \ha ta hle hle mai lo kha a inchhir ngawih ngawih tawh a ni.

In ngaihtuah buai taka a din laiin a bul lawkah chuan hmeichhe pakhat hi a lo ding reng mai tih a han hmu thut mai a, a phu zawk a, chu hmeichhia chu kum 20 vel hmelpu a ni, ngo lampang, hmaibial deuh, hmel pawh chhe lo tak a ni. Doctor leh nurse ten accident tawk hmeichhia an buaipui lai chu râp hmel zet hian a thlir a.

Hriltea chuan hmeichhia chu chiang leh zualin a han en a, ambulance-a accident tawk hmeichhe ruang an zawn luh mek nen chuan in ang riau hian a hria a. Phir an nih loh pawhin phir tluk deuh thaw-a in ang chu an ni hrim hrim. A va pan hnai deuh a, “Ka pi, saw hmeichhia saw i hriat mi em ni?” tiin a han zawt a. Hmeichhia chuan Hriltea chu mak tih hmel zet hian a han en a, “Keimah a nih saw, keimah, awi, ka hlau êm mai,” a ti a, a mit atang chuan mittui a rawn sur nguah nguah a.

“Ka pi, i hre sual a niang, a ni te chu saw a thi tawh alawm, nang te chu hei i la dam reng alawm, engtin nge chutiang tea i sawi ngawt theih, in in ang êm a i rilru a ti buai deuh mai mai a niang, hlauthawng duh reng reng suh,” Hriltea chuan a han ti a.
“Vala, khawngaihin i hming min hrilh thei em?”

“Thei tehreng mai, Lalhrilliana ka nia, ka thiante chuan Hrilte tiin min ko thin.”

“Hrilte, khawngaihtakin ka thusawi hi uluk takin min lo ngaihthlak sak ang che, i âwih emaw âwih lo emaw, mitthi i hmuh saw keimah ka ni, ih maw, ka hming chu Lalrempuii a nia, kan vêng chu khatla a ni, ka pa chu T.Liankhuma a ni, khatla ah chuan tu pawn an hria ang, khawngaih takin kan inah chuan min va kal sak ta che.”

Hriltea chu a tha a khur nghal dawt dawt a, he hmeichhia hi a â a ni ngei ngei ang.

“Hrilte, khawngaih takin,” hmeichhia chuan a han ti leh a.
“Awle, i duh ang chuan ka ti dawn nia, in inah chuan eng nge ka va tih ang?”
“Ka pa hnênah khan pawisa kha chu ka khum hnuaia bawm ah khan ka dah a, bawm kha number hmangin ka kalh a, a hawnna chu 9800653 a ni tih i hrilh dawn nia, a hrethiam vek mai ang, khawngaih takin min tih sak hram rawh aw Hrilte.”

“Awle, ka ti ngei ngei ang, ka tiam a che. Mahse, nangmah pawhin chute chu i hrilh thei tho lawm ni?”

Hmeichhia chu lungngaih hmel tak hian a lang a, Hriltea hmuh lai reng chuan engmah sawi lovin a thâm ral ta mai a.

Hriltea chuan a thil tâwn chu a hlau kher mai, a khur hlawk hlawk a, chu lai accident thlenna hmuna mipui zi huai huai te pawh chu ambulance-in hmeichhe ruang ber damdawiin lam pana a phur sawn tak avangin an in thiar fihlim tan ta hlawm a. Chanchinbumi ni awm tak tak \henkhat erawh chu thil chiang leh zual hriat duhin an note butê leh ziakfung kêngin an la chambang hlawm a. Hriltea pawh hmanhmawh takin in lam panin a tlan haw nghal a. A thil hriat leh hmuh te chu a mumang mai mai nise a ti kher mai; mahse, mumang mai zawng a ni si lo. Kha hmeichhia Lalrempuii inti kha tun hmâin a hmuh ngai pawh a la hre lo. Khatia an inbiak vel lai khân an bula midang vei nuai nuaite khan an hmu ve thei lo tak tak em ni ang. A nu hnenah sawi ta se, a nu meuh pawhin a awih dawn em ni?

Dar 4:30 pelh hretah an in chu thlan tla hluamin a thleng a, a nu chuan râwng a lo bâwl mek a. Hriltea chuan engmah sawi lovin a pindan a pan ding nghal nalh a. A sikul uniform a thlak sawk sawk a. Khumah chuan rilru hah leh thlabar ru takin a mu a.

A nu in chaw ei tura a rawn koh takah chuan choka lamah chuan phur lo takin a phei a.

“Bawihte, vawiin chu i va hlim loh hmel ve, sikul lamah harsatna deuh i tâwk em ni?” a nu chuan a ti a.

“Tâwk lo ve.”

“Bawihte, ka chungah lungawi lohna i nei em ni?”
“Nei lo ka nu.”

A rul tawk chauha a chhân zel avangin sawi zui tur vak awm tawh hek lo, ngawi rengin chaw chu an ei dun malh malh a. Chaw ei kham chuan Hriltea’n hmun a phiat a, a nuin thleng a sil a.

Chaw eina hmun hma vel an tih fel zawh hnuah an nufain TV an en dun a, LPS news-ah chuan vawiin-a Zarkawt traffic point bula nula Lalrempuii Sailo kum 20 mi, Khatla venga T.Liankhuma fanu taxi-in a chil hlum thu an rawn puang ta.

Hriltea nu chuan, “Aw, a lainat awm mange, a chhungte tan chuan a va na duh dawn ve le, \halai thi hi chu an uiâwm dan hi a dang bik \hin, ka lainat ngei mai,” a ti a.
“Ka nu, accident thlen lai khian ka awm ve asin.”
“Eng a?”
“Accident thlen lai khian ka awm ve.”
“Bawihte, pawi ka ti lutuk, i hmu chiang viau tihna em ni?”
“Aw, hmu chiang lutuk, a thi ta nen pawh khan kan inbia asin.”
“Bawiha, thihna thu-ah fiamthu an thawh ngai lo, khatiangin \awng tawh suh.”
“Ka nu dâwt ka sawi lo asin, ka fiamthu hek lo. A thih hnu-ah kan inbia a ni, an inah kal a, a pa be turin min ngen nghe nghe asin.”

Hriltea nu chu a ding ta hluai a, TV chu a hmet hlum nghal a. “Lalhrillian, i thusawi awmzia hi i hria em?”

“Nu, i tan âwih a har hlê ang tih chu ka hria alawm, a tirah chuan engmah hrilh loh che a keimaha tih tlang mai ka tum deuh a; mahse, hrilh che hi ka duh leh ta zawk a ni, khawngaih takin Rempuii te inah zaninah ngei min kalpui la ka duh nghe nghe a ni, thu ka lo tiam tawh si.”

“Hrilte, naktukah Pu Hrekima hnenah kal ila a \ha ang, anin a pui thei che in ka ring a ni. Tunah chuan, i pindan lamah va kal tawh rawh, zirtawp zan a ni bawk a, lehkha pawh i zir lo mai dawn nia, va mu harh la a tha ang,” rilru hah hmel zetin Hriltea nu Sangzuali chuan a ti a.

“Ka nu, ka thusawi te kha i awih miah lo a ni tiraw?”

“Âwih miah lo, âwih tur pawhin min beisei hek suh.”

“Ka nu dawt ka hrilh che i hre tawh em?”

“A hma chuan hre lo, tunah chuan ka hre tawh, insiam la, va mu rawh.”

“Ka nu khawngaih takin ka thutiam bawhchhe turin min ti lui lo hram rawh.”

“Lalhrillian, eng thutiam nge maw i sawi sek le, va mu rawh: ka vuak hma che hian.”
“Ka nu....”

“A tawk, sawi tawh suh. I pindan chu va pan rawh.”

Beidawn hmêl takin Hriltea chuan a pindan chu a pan phei hnak hnak a.

III
Zan dar 11:54 chiah a ni. Hriltea chu a khumah a mu meng kar a. Vawiin tlaia a thil tawn mak tak kha a ngaihtuah reng a. Rempuii hnena a thutiam kha a hlen thei ta si lo. A nuin a thusawi a awih duh miah lo kha âwm a tih viau rualin, a rilru erawh a nâ a ni. A hriat theih chinah a nu hnênah hian vawi khat mah dawt a sawi a la hre ngai lo. Sawi pawh a tum hek lo. Mahse, tunah chuan a nuin dawt sawiah a puh ta tlat si.

Choka lamah thawm ri rak hi a han hria a. A phu deuh zawk a. A nu mu thei lovin ei tur eng emaw a zawng a nih a ring deuh a, khum a\ang chuan dim takin a tho a, a pindan bul chiah chu a nu pindan a ni, dim têin a nu pindan kawngkhar chu a han hawng a, a nu chu tui deuhin khumah chuan a mu tih a hmu a.

Choka lama thawm a hriat chu a nu thawm chu a ni lo tawp mai le. Thin phu dep depin choka lam chu a pan phei \ham \ham a, light a in on loh avangin a thim deuh \hap a, tukverh a\anga thla êng zung lo lut chu êng awm chhun a ni, tlai lama a thil tawn râpthlâk takte avanga a hlauhthawnna a la reh fel lo nen, Hriltea chuan a hlau kher mai.

Choka leh sitting room daidan nan parda sen a inzar a. Zawitêin parda chu a han keu dek dek a, hmeichhe pakhat hi chaw ei dawhkan chungah chuan ngawi rengin a lo thu tung a, a han en chiang a, vawiin tlaia accident tawk Rempuii ngei kha a ni. A dul chu thisen hian a bual zuih a, Hriltea chuan a hlau kher mai. Khur ru zawih zawih chungin choka ah chuan a lut a. Rempuii chuan a kut dinglam zungchalin Hriltea chu a rawn kawk a, ‘I thu tiam kha’ a ti a. A thâm ral zui ta daih a.

Hriltea hlau lutuk chu a pindan lam panin baklêngin a tlan chhe phei a, chutih lai chuan thawm a hriat avangin Hriltea nu chu a pindan atangin a rawn chhuak ve chiah a, hlau leh thlabar tih hriat taka Hriltea choka lam atanga a rawn tlan chhuak chu a lo pawm chawt a.

“Bawihte, eng nge ni ta, eng nge ni?” tiin a lo zawt nghal chûl a.

“Ka nu, khawngaihtakin min ring hram rawh, ka thutiam ka hlen loh avangin Rempuii thlarau a lo kal a ni.”

IV
Khatla kâwn atanga vei lam a pên phei deuh hlekah T.Liankhuma in chu a awm a.
Hriltea leh a nuin Rempuii tein an thlen chuan inrinni tlai lam dar 2:30 a ni. Rempuii chu an vuiliam tawh a. Veng chhûng nu leh pa thenkhat thingpui inin an lo la thu khawmuang hlawm a.

Hmelhriat loh pahnih lo lang hlawl mai chuan inchhunga awm hote chu a ti phawklek deuh hle a. Mi mit pawh an chungah a fu deuh thap mai, Pu T.Liankhuma chuan hawihawm takin, “E, lo lêng rawh u, kan chhiat tawh a leiah inleng lo chhâwn dan pawh kan theihnghilh zo tawh a nih hi, kha thingpuite kha in ula, lo thu hah dam rawh u,” a rawn ti ta hlauh a. Hriltea te nufa hrilhhai lutuk pawh chu a ziaawm ta deuh a.

Hriltea chuan, “Ka pu, U Rempuii pa i ni em?” tiin a han zawt a. T.Liankhuma chuan, “Aw ni e, kan fanu neih chhun a ni a, saw saw a nu Thanmawii a nia,” tiin an piah deuh a, nu pakhat a tah nasat avanga mit bui deuh lâk, kum 50 vel hmelpu chu a kawk a. Hriltea chuan, “Ka pu, khawngaih takin a fâlin ka be thei lawk ang che’m?” a ti a.

Naupang kum 12 rual lekin chuti anga fel fai leh hawihhawm taka a han dawr chu Pu Liankhuma chuan mak a ti deuh tih chu a hmel lan dan atang chuan a hriat theih mai a. A hamhaih deuh tih pawh a lang.

“E..aw.. thei e, thei teh reng mai, tirawh, Bawihi Pindan-ah kan han inhmu fal lawk dawn em ni ang, a pawimawh viau a nih hmel e,” tih pahin Hriltea bânah chuan a kâi a, inchung lamah a chhoh pûi ta a.

Rempuii room chu a fel faiin a thianghlim hle a, carpet hring nalh zet mai hi a inphah a, dawhkan tê fel rên râwn hi a pindan dinglam sirah chuan a inhung a, dawhkan chungah chuan laptop man to hmel zet hi a inhûng bawk a.

Khum thianghlim zet mai, a dung lam fit 6, a vang lam fit 4 vel tur hi a awm bawk, khum bulah chuan \huthleng sei mi pathum vel \hut theihna tur hi a inhûng bawk, dawhkan inhûnna ep chiah bangah chuan Mandy Moore poster a in tar a, bang thlang lamah chuan Isua Kros, puan sena invêt lem poster lar tak hi a in tar bawk. Pu Liankhuma chu \huthleng sêiah chuan a han \hu a. Hriltea hnênah chuan, “Tirawh, valte, hetah ka bulah hian han \hu ve rawh,” tiin a sawm zui nghal a.

Hriltea erawh chu pindan lai takah chuan a ding a, \hut tum ve awm hmel pawh a pu lo. “Ka pu, i fanu thihna hmunah khan ka awm ve a.....”

“ Tichuan....”
“A thih hnu khan ka bulah a lo kal a.”

Pu Liankhuma chu a ding nghal hluai a, “Vala, eng nge i sawi awmzia chu, a thih hnuah i bulah a lo kal a maw?” Hriltea thusawi chu a âwih chiah lo tih a hmêlah a chhiar theih.

“Aw, ka pu, i hnêna thusawi tur min chah a ni.”

Pu Liankhuma chu a ngaihna hriat loh hmel zet hian \huthlengah chuan a \hu leh hnawk a. “Eng thu nge Mambawihi chuan a chah che a?”

“Pawisa chu ka khum hnuaia bawmah khan a awm, a hawnna number chu 9800653 a ni, tiin min chah a ni, a dang chu engmah a sawi lo, ka pa chuan a hrethiam nghal mai ang a ti a, nizan khan lo kal nghal ka tum a; mahse, ka nuin ka thusawi a awih duh tlat lo a, lo kal a phal lova; mahse, nizan dar 11 vel khan U Rempuii chu kan inah a lo kal leh a, ka thutiam hlên turin min rawn hriattir nawn leh a ni.”

Pu Liankhuma chu a tho nghal hluai a, Rempuii khum hnuai chu rang takin a dap nghal vat a, bawm pakhat hi a han hnuk chhuak a, “Vala a number kha han sawi nawn leh teh,” a han ti a. A helhhawlh nasa tih a hriat theih mai.

“9800653 a ni e ka pu.”

Pu Liankhuma chuan number chu a han herh mil a, bawm chu a inhawng ta a.

“Vala, i hming kha tu maw ni kha?”

“Lalhrilliana a ni e ka pu, tunah chuan U Rempuii hnêna ka thutiam ka hlên tawh bawk a, kan haw tawh ang e.”

“Ni lo, la haw lo vang, he thil pawimawhzia hi i hre lo a ni, lawmman ka pe ang che, i duh duh sawi rawh Vala.”

“Ni lo ve ka pu, lawmman beiseia lo kal ka ni lo, ka nuin rei min ti tawh lutuk ang, khawngaihin min kaltir tawh zawk mai rawh.”
Hriltea leh T.Liankhuma chu Inhnuai lamah an inzui thla dûn ta a.

V
Pi Sangzuali chuan a fapa nungchang danglam ta riau mai chu a ngaihna a hre lo telh telh mai. Rilru lam doctor rawn mai tur nge pastor lam rawn zawk tur tih pawh a hrethiam mai thei lo.

Zanah rei tak tak thleng a pindanah a inkhung a, zan dang angin TV pawh a en ngai tawh hek lo. Han biak lahin a rul tawk chauhin a chhang a, chaw a ei tlem êm êm a, eng emaw tak hlauh nei niawm takin a awm fo a. Eng emaw tak dik lo a awm a ni tih chu Pi Sangzuali tan chuan hai rual a ni tawh lo.

Nilaini a ni, zan dangah chuan zanriah ei pahin an ti ti bawrh bawrh \hin; mahse, engkim mai a danglam zo tawh. Han hau vak dawn se, a fapa chuan eng thil mah tih sual a neih a hre si lo. Zanriah eikham fel hnuah, TV an en a, an en tan dawn chauha, Hriltea chuan a pindanah a luhsan leh ta daih a.

Pi Sangzuali ngaih a \ha lo ta tak meuh mai. Zanin chu a fapa awmdan diktak hi hriat chhuah a tum tur a ni tiin ngaihtuahna a siam a. Tui vak lovin TV chu a en zui a, zan dar 10 hnuah a fapa pindan lam chu zawitê in a va pan \ham \ham a, kawngkhar chu a inkalh loh avangin zawitêin a hawng a, a thil hmuh chuan a thin a ti \hawng hle mai.

Hriltea chu a khumah fel fai takin a \hu a, a mit chuan a pindan kil thim lai chu a en a, tu emaw nen an inbia a ni.

Hriltea chuan, “A âwih dawn chuang hlei nem, ka sawi ka sawi tawh alawm, a âwih chuang lo, ka sawi peih tawh lo,” a ti a.

Midang tawngri erawh chu Pi Sangzuali chuan a hre ve lo. Rilru hah takin a pindan lam a pan a, naktukah rilru lam doctor râwn ngei a ngai a nih hi tiin ngaihdan a siam ta a ni. Heti ringawt zawngin a awm thei tawh lo, a hmangaih a fapa nungchang inthlak danglam nasa ta lutuk chuan a awm a ti nuam thlawt lo a, a thauah a man deuh roh tlat leh nghal. A hlauh te pawh a hlau deuh roh a ni.

Tukthuan ei laiin Pi Sangzuali chuan, “Hrilte, vawiin chu doctor hnenah ka hruai dawn che, sikul pawh i chawlh mai a ngai ang, in zirtirtute pawh ka hrilh lawk tawh,” a ti a.

Hriltea chu a ngawi reng a.

Pi Sangzuali beisei ber chu Dr.Hrekima a ni, ani hi tunlaia rilru lam doctor-ah chuan a thiam ber leh tawnhriat pawh ngah ber niin a hria a ni. Mahse, Dr. Hrekima chu New Delhi lama a zin lai a lo ni hlauh mai.

Telephone directory a\angin rilru lam doctor râwn tlak deuh tur âwm a han zawng a, Dr. Zarzoliana tih chuan a mit a la ta deuh ber a.

Dr. Zarzoliana office chu rin aiin a hla fê mai, rilru doctor office ni âwm takin a hmun awmna pawh a fianrial raih mai.

Reception counter-ah chuan tumah an lo awm lova, Pi Sangzuali chuan thil tih loh tawp tur an ti niin a inhre tan tawh. He doctor hi doctor tak tak pawh a ni hrep lo vang e.
An intiam hun chiah chawhma dar 11 ah Dr.Zarzoliana pindan chu amahin a rawn in hawng a, khawi lam atanga lo ri chhuak nge tih pawh hriat loh hian ‘Lalhrilliana’ tih hi a rawn ri a. Hriltea chu kawngkhar inhawngah chuan a lut ta a.

Pindan chhung chu a nuamin a thawveng hle A.C hmanga boruak thunun a nih avangin alum leh vawh thûah duhthusâm boruak dawn tur a awm bawk.

Dawhkan lianpui mai hi a in hung a, hnungah chuan Dr. Zarzoliana chu a lo thu a. Hriltea chuan chu doctor chu a hmuh tirh phat atangin a ngainat zawng mi a ni tih a hre nghal mai.

“Tah khan thu rawh Hrilte.”

A thutna kawhhmuhah chuan Hriltea chu a thu a.

“I harsatna te chu min han hrilh ta che, engkim mai aw, i hmel ka enin dawt i sawi ngai lo ang tih ka ring nghal thlap mai,” a han ti a.

“ Englo... mitthi thlaraute hi ka hmu \hin a...ih.. ka nu hian a awih bawk si lo...”

“Kei chuan ka awih thlap mai, a nih engtin nge chung thlaraute chu i hmuh \hin min hrilh phal em?”

“Zanah a ni tlangpui, an lo kal a, an dam laia an tih zawh hman loh thilte ti turin min ngen thin a ni.”

“Tichuan, an ngênna ang chuan i tih sak thin em ni?”

“Aw, a \hen chu ka tih sak; mahse, a then chu tihsak theih chi pawh a ni lo.”
“Tihsak theih chi a ni lo’ itih chu eng nge a awmzia min hrilh phal em,?”

“Ih.. ka hrethiam chiah bik lo, a then chu a lo tlai tawh lutuk thin a; tin, a then chuan an chhungte hnênah ngaihdam dil turte in min ngên thin, an duh angin sawi mah ila, an chhungte chuan an awih dawn chuang tlat lo a ni.”

Thil hrang hrang an inzawt a, darkar khat chuang mah an inkawm hnu-ah Hriltea leh a nu chu an haw ta a.

Zanriah an kil laiin Hriltea nu chuan, “Mamte, doctor chuan engtin nge a lo tih che a, min han hrilh ve la,” a han ti a.

“Naktuk ah lo kal leh rawh a ti.”

“Nangmahin maw?”

“Aw, i nu chu rawn hruai duh tawh lo mai rawh, i natna ang chi hi chu mi tam takin an vei alawm, tih dam a harsa lo a tia.”

“A \ha a nih chu, ka tel lova kal chu i hreh lo ang maw?”

“Hreh lo ve ka nu, a hrim hrimin, i hna ah i kal a ngai a, keimah vanga i kal loh fo hi \ha ka ti lo.”

“Bawihte, ka hmangaih che.”

“Ka nu, kei paw’n ka hmangaih che.”

“Naktuk ah chuan nangmah ngeiin i va kal dawn nia, taxi fare ka pe ang che, a hmun pawh i hriat tawh kha, harsatna thleng a awm chuan min hrilh vat dawn nia, bawihte, he khawvelah hian ka neih chhun i ni tih hre reng ang che, i tel lo chuan i nu hi engtihna mah ka ni lo tih i hre reng dawn nia aw,” a ti a.

Eng emaw chen an nufaa TV an en leh hnuah an pindan ve ve panin mu turin an inmang\ha ta a.


VI
Dr. Zarzoa leh Hriltea te chu tun hma a\anga lo inhre tawh \hin ang maiin an inkawmngeih em em a. Engkim mai an in hrilh bawrh bawrh a.

Hriltea pawhin a thusawi apiangte âwihsaka ngaihvensaktu a neih tak avangin a nun pawh a hma zawng aiin a hlim zual zel niin a lang.

Dr.Zarzo-a pawhin Hriltea chu a ngaina ve takmeuh niin a lang. An pahnihin hun tam tak an hmang dun a. Pi Sangzuali pawhin Dr.Zarzo-a hnena a fapa a hruai hnu a\anga a fapa nungchang danglam chhoh tak zia chu a hmu a, lawmawm a ti hle mai.

A hnaah a buai em avangin Dr. Zarzoa hmuhna hun pawh a la nei lova, a inthiam lo hle nghe nghe a ni. Hriltea pawhin a nu hnenah Dr. Zarzova chu hmu ve turin a ti tawh; mahse, remchang a la awm thei lo a niang. Dr. Zarzoa enkawlna hnûaia Hriltea’n thla khat pumhlum hun a hman hnuah pawh Pi Sangzuali leh Dr.Zarzoa chu hmaichhanah an la inhmu miah lo a ni.

A fapa-in a tur nasat tak êm avangin Pi Sangzuali chuan Dr.Zarzoa hmuh chu rem a ti ve ta nge nge a, remchang hmasa berah inhmuh an tithlu ta a ni.

Inhmuh hun tura an ruat chu zirtawpni tlai lam dar 5:30 ah a ni . Dr. Zarzoa chu Hriltea te inah zanriah ei turin a rawn kal dawn a ni. Pi Sangzuali pawhin a fapa nungchang nasa taka siam \hat saktu Dr. Zarzoa chu hmuh a chak ve tawh hle a, zanriah pawh theih tawpa tuihnaiin a lo buatsaih a ni.

Dar 5:25 a ni tawh, zanriah pawh ei theih turin Pi Sangzuali chuan a peih fel thlap tawh. Hriltea pawh pawn vanrandaah Dr. Zarzoa lo thlen hun tur nghakin a lo \hu vang tawh. Dar 5:30 a ri ta chiah, Hriltea chuan lawm tih hriat takin, “Nu, doctor a lo thlêng e,” tiin a nu chu a rawn hrilh a. A awki a\ang mai pawhin Hriltea chu a phur hle tih hai rual a ni lo.

Pindanah chuan Hriltea chu a lo lut a, Hriltea nu chuan chaw ei dawhkanah chuan mi pathum ei tur a lo chhawp lawk thlap bawk. Hriltea chuan, “Pa Zar, ti rawh chaw ei hmain ka pindan rawn en phawt rawh, ka poster tar te pawh i hmuh chak thu min hrilh kha,” a ti lang lang a. Pi Sangzuali chuan choka-ah a lo nghak ran thung.

Hriltea pindana minit 6 vel hun an hman hnuah choka lam panin Dr. Zarzoa leh Hriltea chu an lo phei ta a.

Pi Sangzuali pawh a hamhaih lo chauh a ni ber. A fapa in a ngainat em em, doctor fel leh hawihhawm tak hmuh hlan chu a nghakhlel hle tawh a ni.

Nui sangin Hriltea chu chokaah chuan a rawn lut a, “Pa Zar hei hi ka nu chu a nih hi, a hming chu Sangzuali a nia, i hriat tawh kha...”

Pi Sangzuali chuan a fapa hlim hmel chu a en reng a. Mahse, Dr. Zarzoliana hmel erawh a hmu lo.

“Hrilte, khaw nge i Pa Zara chu?”
“Hei heta hi a awm reng hi.”

Pindan chhungah chuan mi pahnih chiah an awm. Hriltea leh a nu Pi Sangzuali chiah.
Pi Sangzuali chu a ngaihna hre lo takin a ding zum zai a. “Hrilte, khaw nge doctor chu?” a han ti nawn leh a.

“Hei heta hi a awm reng hi ka nu, i ti mak em mai. Pa Zar, ka nu hi chu fiamthu a duh ve a nia, i hrethiam dawn nia.”

Pi Sangzuali mit atang chuan mittui a lo luang chuak nguah nguah a. Engmah sawi tur pawh a hre tawh lo, hrilhhai tih hriat takin choka chu a tlan chhuah san a, a ma pindan lamah a tlan lut a, khumah a bawk thlawp a, chhuak em emin a tap ta hlawp hlawp a.

VII
Dr. Zarzoliana chuan Pi Sangzuali awmdan chu hriatthiam har a ti kher mai. Hriltea te ina awm reng pawh chu nuam a ti ta lo, Hriltea hnenah chuan chhuanlam siamin haw mai a duh thu a sawi a. Hmanhmawh takin a chhuak ta nghal a.

Rilru buai nuai chungin a pisa lam a pan a. Engati nge Hriltea nu khan khati anga a lo tih mai ni. A fiamthu mai mai em ni zawk. Mahse, chaw ei dawnkanah khan mi pathum ei tur a inchhawp thlap si.

A pisa chhungah chuan rilru mumal pawh pu thei lovin a lut a. A rilruah chuan zawhna hlir zawhna hlir a lo lang a ni ber.

Telephone chu a han lek kang a, an in number a han hmet a. A nupui, a hmangaih êm êm Lawmzuali chuan ‘Hello’ a rawn ti a. Dr. Zarzoa chu a thaw huai a, “Hello darling, naupang ho an mu tawh em, hna laklawh deuh ka nei a, ka rawn tlai deuh a ni, hei ka rawn haw dawn chiah e.”

“Hello,” tiin a nupui chuan a rawn chhâng leh a.
“Darling.”

“Hello, tu nge ni aw Hello, ka awng i hre thei em?”

“Hello, Lawmzual, keimah i pasal Zarzoa ka nia.”

“Hello, hello,” Phone chu a thi ta a.

Dr. Zarzoa chu hmanhmawh zetin a pisa a\ang chuan a tlan chhuak a, an in lam panin baklengin a tlan a.

Minit 20 hnu velah an in chu a va thleng ta hlawl a. Kawngkhar chu dim lo baksakin a pawt hawng rawp a, “Lawmzual, Lawmzual,” tiin a nupui chu a ko chul a.

Chhangtu an awm mai loh avangin an nupa pindan awmna inchung lamah chuan hmanhmawh takin a tlan chho hlawk hlawk a. Hmangaih taka a nupui nena an lo mut dunna \hin, khumah chuan hrilhhai zetin a \hu hnawk a. “Lawmzual, Lawmzual, Darling, khawnge maw in awm zawh vek le?” tiin a han au leh tuar tuar a.

Chutih lai chuan an nupa pindan kawngkhar chu a rawn in hawng a, a nupui, a hmangaih, a en chim loh, Lawmzuali leh mipa pakhat tu nge a nih pawh a la hriat ngai loh hi an rawn lut a. An awm dan velah chuan an in thlahlelin an in hmangaih hle niin a lang. Khum-a Dr. Zarzoa lo \hu reng chu an hmu miah lo tih an hawi her atang chuan a hriat mai.

“Lawmzual, kha pa kha tu nge, eng vanga kan nupa pindana rawn hruai lut ngawt nge i nih?” a han ti a. Mahse, chung mi pahnih te chuan a thusawi chu an hre lo.
Mipa zawk chuan, “Darling, a tawp a tâwpah zawng kan nghak chhuak ta hram a lawm tiraw, tunah chuan dan ang thlapa kan inneihna daltu tur engmah a awm tawh lo. Kohhran lam pawhin RL pawh an pe phal tawh ngei ang che.”

“Ni e, tunah chuan engkim a fel vek tawh e. RL pawh ka la daih tawh alawm.”
Dr. Zarzoa mangang leh hrilhhai lutuk chu pindan chhungah chuan a vei kual ruai a. Chung mi pahnihte thusawi awmzia chu a hrethiam lo a ni.

Lawmzuali chuan, “Taka a thlanlung tur pawh a pain ka rawn buaipui ang e a ti a, a tihzia khawp mai.”

“Mahse, fimkhur taka kan awm zel erawh a ngai dawn a nia, kum thum dawn ni tawh mah se, mite thikthu hi heti ang lamah hi chuan a chhe hma riau a nia.”
“A dik alawm, fimkhur tluk chu a awm lovang. Mahse, kan thiam loh a ni hleinem, kan thah lah ni hlei lo.”

Khumah chuan chung mi pahnih te chu lungchim takin an mu dun rial a.

Dr.Zarzoa mangang lutuk chu in hnuai lamah a chhuk thla a, chutih lai tak chuan ruah phingphi siau hi a rawn sur sar sar a. An in piah lawka rumrawk dahna lamah chuan ngaihtuah mumal pawh nei lovin a tlan lut a,a thim kher mai. Thil thlen dan chu a hrethiam thei lo. Engkim mai chu mumang ang ruai mai ni berin a hria a. A taksa te chu a han khawih ringawt thin, engkim mai chu dik lo a awm a hre lo. Na a hria, a taksa huh pawh a hria, vawt leh lum pawh a hria. Mahse, engati nge.......engati nge?

A iptea lighter a ah chu a han phawrh a, a han talh êng a. Lung pakhat, thlanlung ni âwm tak hi a han hmu a. Lighter êng hmang chuan thlanlung a thu inziak chu a han chhiar a. Chu thlanlungah chuan hawrawp mawi tak mai hian heti ang thu hi a lo inziak a.

Kan Hmangaih Kal ta
Dr. Zarzoliana
Pianni : 22/4/1973
Thihni: 18/7/2009
“Luiral ram mawiah kan in tawh leh kan beisei’
Phuntu: Lawmzuali (A nupui)
R.LThansanga (A pa) Sangziki (A nu)


------Puitea Tuallawt