DESMOND DOSS (HACKSHAW RIDGE)

A tirin:

American Film siamtu leh changtu ni bawk Mel Gibson chuan he thawnthu tak hi movie-ah siamin tunlai hian khawvelah a lar tan mek ta. He movie siam nan hian USD 40 million sen ral a ni a. January 11, 2017 thleng khan USD 162.6 hmu chhuak tawh anga ngaih a ni.


Tu nge Desmond Doss a chu:

Kum 1919 February ni 7 khan Lynchburg, Virginia ah William Thomas Doss leh Bertha E Doss te fapa ni turin a rawn piang a. A pa hi thing mistiri a ni. A nu hi kohhran mi em em mai a ni a. Seventh-day Adventist kohhran a tui em em mai a ni a. A fama Desmond a pawh hian Adventist ten an ngaih pawimawh em em mai, Tharum thawhlo (Non-Violence), Sabbath Uluk taka serh leh Sa ei lo nun (vegetarian lifestyle) nei thei turin nasa takina kaihruai a ni.

Great Depression hun laia America ram Economics nasa taka a tlakchhiat avangin pawl kua (9) thleng chauh a zir tihin zirna lam a bansan ta a. Chutichuan Indopui II-na  alo thleng ta a. Newport News Virginia-ah lawng lam enkawl hna a thawh avangin a duh chuan sipai hi tang lo thei a ni. NImahsela a ram tan thil tha tih ve a duh si a, ralthuam kenglo turin April 1942 khan US Army medic hna a zawm ve ta a ni. Fort Jackson, South Carolina hmunah 77th Infantry Division ten en training an nei ho ta a ni.

Chutichuan Indona muala lut turin 77th Infantry Division-te chu Pacific tuipui chheh vel hrutin an tei kual ta a.  2nd Platoon, B Company, 1st Battalion, 307th Infantry, 77th Infantry Division hnuaiah awmin Guam ah te, Philipines ah te leh Japan thliarkar Okinawa-ah te an che vel a. Japan ram atanga mel 340 a hla, Okinawa thliarkara an awmlai hian Japan sipai te nen nasa taka inbeiin he hmunah hian a hming  a chher ta a ni.

Engvangin nge ralthuam a hum ve duh loh?

Desmond Doss hi Seventh-day Adventist kohhran ruh em em a ni a. A nu leh a pa ten an kohhran Adventist inzirtirna a naupan lai atanga a rilru a an tuh chuan a nun a kaihruai nasa em em a. “Ka pa hian Thusawm pek leh Lalpan Tawngtai dan min zirtir (Lord’s Prayer) hi bangah nalh takin a frame siamin a tar a. Thupek parukna ‘Tual I that tur a ni lo’ tih kha ka thinlungah ka vawng reng a. Kaina’n a nau Abela a that thei kha mak ka ti a. Isua erawh chu midangte nunna pe turin leh chhandam turin a lo kal a. Isua anga midangte nunna la tu ni loin midangte nunna humhim leh chhan chhuaktu nih zawk hi ka duh a ni” tiin a sawi a ni.

Silai leh ralthuam a hum duh loh avang hian a thiante, a sipai tanpuite hian an nuihzat thin a. An training lai ata tawh ralthuam hum ve lo tura medic nih a dil a, mahseilai hum ve ngei thei turin rifle company ah dah luih ngat a ni a. Nimahsela silai a hum duh tlat si lo a. A ipte ah chuan Bible a ak reng a.  Fiamthu thawh nan an hmang a. Mi thianghlim Isua (Holy Jesus) emaw Mi thianghlim Joe (Holy Joe) tih ten an ko nawmnah thin. Sipai hruanghrau na pui puite chuan mi dawihzep leh raldo ngam loah an chhal a, chhaih nawmnah teh an an nei thin.

A rualthuam hum duhlo chu thu hran, Thusawm pek a a palina “Chawlhni thianghlim taka serh tur a ni tih hrereng rawh” tih chu a vawng tlat a. Hei hi a sakhaw vawn mek Adventist-te chuan an ngai pawimawh em em mai a. Chawlhni (sabbath) ni hi Bible in a ziak angina Friday tlai ni tlak atanga Saturday tlai ni tlak leh thleng serh a duh a. Hei vang hian chawlhni (sabbath) ni ah chuan hna reng reng a thawk duh lo thin. Medical Corp lama a pu Captain Solomon Statman chuan Sabbath ni a inkhawm a tum reng chuan court martial hial-ah a vau a ni.

Indona-ah chuan:

Okinawa thliarkarah chuan Japan sipai chu an inkulh mup mai a. He thliarkar hi tlang chhengchhe tak hi feet 350 vel zet a sang hian kham hian a hual vel a. Chung kham karah chuan pukah te, leiverh chhungah te Japan sipai an tawm ther fuk mai a ni. Han luh chhuah chu a hlauhawm em avangin thil huphurhawm tak a ni. He tlang lak tum hian American sipai-te chuan thapui an thawh thin a, an beih apiang chuan thi leh hliam an tlu kal nelh nulh mai a ni. Zan a lo ni a, thapui thawhin an han bei leh a, a tawn tawn chuan an hek hauh hauh hle mai. Silaimu ving thuak thuak leh bomb puak dup dup karah chuan American sipai hliamte chu hmun him lamah thiar an ngai a, mahni lu zuar tan lo chuan tih chi a ni lo. Chutah tak chuan mi huaisen Desmond Doss a rawn lang ta a. Janpan ho chuan Hacksaw Ridge atang chuan American sipaite chu umkir tum thapui an rawn thawh ve ta mai a. American sipai chu an tawlh hun hun mai a, an thiante thi leh hliam pawh an ruang an hlawm hlei thei ta lo. Doss a chu tawlhkir ve mai loin nileng leh zan thlengin a thiante hliam chu hmun him lamah a thiar ta ngat ngat mai a. Mi za tel hmun him lamah a thiar chhuak a, chung zinga 75 te chu an dam khawchhuak ta a ni.

A tukah chuan thapui thawhin American ho chuan an han nawr leh ta a. He mi ni hi Desmond Doss a chawlhni Sabbath a lo ni leh tawh a, nimahsela a thiante hliam buaipui turin a thawk chhuak ve leh ta a. Chutichuan Battle of Okinawa ah chuan American ho chuan hnehna an chang ta a ni.

Chawimawina:

A hnathawh that em avang leh a huaisen em avang hian Bronze Star Medal, American Campaign Medal leh Phillipines Liberation Medal, Purple Heat, Good Conduct Medal World War II Victory Medal, Army Presidential Unit Citation, Meritious Unit Commendation te  dawng a. October 12, 1945 khan US military chawmawina sang ber Medal of Honor chu President Harry S. Truman an a hlan ta a ni.

A hun hnuhnung lam:

Raldona hmuna  a hliam avang chuan hna hram a thawk thei tawhlo a. A nupui Dorothy-I hlawh leh a pension beitham tak hmangin Rising Fawn, Geogia-ah ram an lei a. A fapa Desmond Jr. a ten en an huanah thlaite chingina  rem chang chang hna an thawk chho a. A nupui Dorothy hian November 1991 khan a boralsan a. He mi hnuah hian Frances Duman nen innei leh in kum 2006 khan thawhlehna ni ropui nghakin min muthilhsan ta a ni.
#Mkhiangte