DAN CHUNGCHANGA ZAWHNA LEH CHHANNA

Zawhna leh Chhanna:

1. Outpost emaw Police station a FIR an pawm duh loh hian SP ah kal mai tur tih a ni a. SP khan a lo pawm duhloh leh chuan khawiah nge kan kalpui tak ang? Magistrate in kha FIR ah khan cognizance a siam hian enge a tum tak leh a case kalpui dan tur min hrilh thei em aw?



- SP khan i FIR a lo pawm duh lo a nih chuan Judicial Magistrate i pan tawh mai ang. Magistrate chuan dan anga hmalak bak tum a nei lo ang, chumi chipchiara sawitur chuan a thui deuh hlek a, a tawi zawngin ’Criminal Procedure pangai angin a kalpui ang’ tiin ka chhang mai ang che.

2. LL.B zir tur hian HSSLC ah eng subject te nge lak tha ang le? Min pui theih chuan ka lawm khawp ang.

- Arts line-a kalin Political Science, English leh History subject zir uluk a tangkai viau.

3. Cable Operator (Mizoram) te hi an film pek (chhuah) kawngah hian "Mipat hmeichhiatna hmanglai, a ngialngana Lanna awm ang chi" hi pek (chhuah) phalsak an ni reng em?

- Eng film pawh, "Mipat hmeichhiatna hmanglai, a ngialngana Lanna awm ang chi" thlengin khapna hran a awm a nih loh chuan chhuah phalsak anga ngaih theih an ni ang. Sawrkar thuneitute kut a ni e.

4. Current chianglo complaint fo hnua siamthat ziktluak loh vanga in chhung bungrua entirnan: fridg, TV etc chhia hi a siam man chawi tir thei niin an sawi a, a nih chuan Department hi khin theih tihna em ni?

- Aw, khin theih an ni e. Consumer Disputes Redressal Forum-ah emaw Civil Court-ah emaw i khing thei ang.

5. Company pakhat nen hna kan thawk dun a; pawisa pawh anmahni hnenah deposit teuh a ni a. Hna tan hmain deposit 5% chu refund tura agreement sign a ni a. Mahse hna kan thawk a kan thawhna bill chu company chuan min pek that duh loh avangin kan hna chu terminate a ni a. Kan inremna ziah ah chuan thubuai a awm chuan arbitrator hmanga chinfel tur tih a ni a. Mahse kan deposit pawh min refund lova; kan thawhna bill pawh min pe kim bawk lova. Arbitrator court in ruat tura a tih pawh an rawn ruat duh bawk si lova. High court a kal mai chi nge? Engtia tih tur nge ni ta ang?

- Arbitrator Court-in ruat tura a rawn tih chu han sawi fiah tel la chuan i zawhna hi a fiah kuar ngei ang. In ‘Terms of Agreement’ anga Arbitor hmanga in chingfel theilo a nih chuan Court pangai in pan mai chu a ngai a nih chu.

6. Mimal kut atanga kohhran ram atana in hmun lei hi Land lease a Siam Leh kher a tul em? Land lease-a dah lo hian LSC pangngai hian mimal hming a dah hi a pawi dawn em ni? Khawngaihin thurâwn min lo pe.

- Kohhran ram a nih tawh chuan nakina harsatna lo la awm thei pumpelh nan kohhran hminga dah a fuh ber.

7. Sorkar hnathawk ni chungin Tualchhung chanchinbu editor & publisher nih hi dânin a phal em? Zirlai higher chin chung lam ni tawh tân, zirlai ni chungin chanchinbu editor & publisher nih hi dânin a phal em?

- Sawrkar hnathawk ni chunga sum siam nana chanchinbu editor & publisher nih chu a rem hauh lo a, sum samna a nih leh loh erawh chuan a rem e. Zirlai tan erawh chuan a thiang ve ve thung.

8. Uiin mi a seh hian a seha te vaccine lakna senso hi Ui neitu te tum tur a ni em le?

- Vaccine lakna bakah senso dang pawh tumtir vek theih an ni.

9. 'Dan' ina 'MIPUI' a tih hi eng chin hi nge? Naute sen atanga
Tar thleng hi em ni?

- Aw, ni vek e.

- K.Remruatfela